Inuulit kan kolom na ine an tema tungkol sa marhay na pagsonod kan mga probisyones kan Ordinansa No. 2003-024 na iyo an pagmangno kan mga bakanteng lote sa laog kan ciudad nin Naga lalo na sa kasentrohan kan ciudad.

Kon sana binasa kan mga taga Naga an kolom na ine kan naka aguing isyu, segurado ako na natawan sinda, kamo, nin marhay na idiya asin direksyon kon pano mapapakinabangan kan kadaklan na tao sa ciudad an mga bakanteng lote sa kapalibotan niato na aroaldaw, serosemana, bulan-bulan padagos naghihibog an doot, nagdadagdag an ramog asin ringot, nagdadarakula an mga kino, mga halas sa irarom kan doot, nagbabaho an tubig sa irarom kan doot, ta dai man lamang nagagabihan, nahahawanan an lugar, padagos lang pinapabayaan minsan ngani palan hagop na ine nin ORDINANSA na nasambit sa itaas, na kon ipinagimplementar sa nakaagui nang duwang taon (2003 – 2005), seguro minsan paluway-luway sana, dakol na kotana an na resolveran.

Ano daw kaya ta naisipan ine na ipasar an Ordinansa No. 2003-024 na ine? Bajo ine sa observasyon na guinibo kan autor kan ordinansa asin sa “public hearing” na guinibo bago ine aprobaran. Naheling an dakol na lote na nakatiwangwang sa mga pagoltanan nin mga kaharongan, lalo na idtong an mga kagsadiri bakong mga taga-Naga asin nageestar sa ibang lugar an iba ngani nasa ibang bansa kaya an mga katiwala pinababayaan lang na dai aserkasohon, habo pang magbayad na maplinigan ta katiwala man lang daa sinda. An Ordinansang nasabi sa itaas, na aprobaran kan Sanggunian Panglunsod. Pinirmahan ni Mayor Robredo, naipublicar pa ngani sa periodico, kaya an ciudad nagkagastos. Daing rason na ine dai iimplementar ta bako man nganing kargante sa kagsadiri. Dai man babawion an pagkasadiri kan Lote. Gagamiton lang malinigan asin pakinabangan pansamantala o temporariamente na matanaoman nin mga “seasonal” man lang na tinanom na kon kaipuhan na kan kgsadiri tolos puedeng pondohon an gamit tanoman. An lote magigin pa maayos, malilinigan, dai makakaperhuisyo sa kataid asin matatawan hanap buhay si mga taong mayo nin lugar na tanoman. Sabi kaiyan napaka “people oriented “ an ordinansa; bako man magastos sa gobyerno ta privadong tao an malinig, matanom. An mapakinabang mga privadong tao man; mayo nin gira nin “corruption” ta mayo man nin madedelehensya digde solamente gugulayon o productong kakanon; tibaad pa ngani maka contribuer sa buhis kan daga ta maheheling na kan kagsadiri an importansya kan saiyang pagsasadiri, tibaad ngani magkabarakalan na nin mahal, sa BIR pa saka sa tesoreriya kan ciudad mapuli an taxes na makukoa. Pero antes kaiyan, an importante seguro iyo an epekto sa Kapalibotan sa pa agui kan paglinig asin pagpagayon kan mga lote asin sa pagtanom nin mga magkakanigong panamnon na marhay sa lawas asin salud nin tao.

Ano daw kaya kon pangenotan guirary kan mga Kagawad kan satong mga Barangay sa liderato kan satong mga Barangay Chairman. Sinda iyo an lyabe kan marhay na implementasyon kan ordinansang ine. Siyempre na an pagpasonod kan ENRO na pinag crear kan ciudad na iyo magmato kan mga arog kaineng actividad. Ano daw kon reviewhon kan ENRO an Ordinansang nasabi digde, adalan uli, planohon an tama asin marhay na implementasyon . Totokan na gayo asin lampasan an dating guibo na hanggan sana sa seminar nakaka abot an implementasyon. Kaya gastos sa gobierno kulang an producto. “We must go beyond the planning and discussion phase of a project but aspire towards the final accomplishment of the targets”. Itulak isolong an actwal na akomplisimiento kan proyekto, Mabuhay an gobiertno, mabuhay an ENRO, maguin tunay na makatao, an Kaplibotan tunay na maaserkaso!