---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


3 Little Pigs

May tolong orig-orig na naka-istar sa daculang tangcal,
Matambok an lobot, borosog ta bastante an pagcacan.
An matuang si Piggy an pirming dacul an nadudungcal na sagmaw,
An duwang tugang na si Micky asin Iggy pirmi man nakikisawsaw.

Sarong aldao habang torog-torog an anayon na si Glory,
An tolong orig-orig naghingirib na huminale sa saindang istaran.
Sinda puminasiring sa badang na pig-eerokan nin mga ka-origan,
Asin mayong pag-alangan, maisog ining pinag-sarabihan:

“Camo magdarangog, asin saindong tungkusan!
Magpoon ngonian kamo gabos samuya nang nasasakupan!
Kaya dae kamo nanggad magduwa-duwa o makalingaw
Na maghiras samuya can saindong nakuku-ang mga pagcacan!”

Biglang puminondo an mga orig ta ini nacorobhanan,
Nagtiripon asin sinda luway-luway na naghiring-hingan:
“Sa-irisay an mga aroganteng orig-orig na suminalta sa satuyang lugar?
Na gustong maghadi-hadi saka makihiras sa kakanon na satuyang pigpagalan.”

“Dae nindo bisto an samuyang inang anayon sa daculang tangcal?
Na iyo an napiling mamayo sa gabos na orig na paraduncal.
Kaya nararapat man na kami saindong igalang,
Mahirasan sa pagkakan, asin enot na makinabang.”

Kuminorahaw an mga aranggot na orig sa magturugang:
“Mga daing sopog kamong pamilya na mawot mag governar!
Dae na ngani nindo natatabangan an samuyang rorong camugtacan,
Makikisama pa kamo sa samuyang dikit na hinanapan!
Layas! Layas! Dai mi kamo caipuhan,
Ta dahil sa saindo lalong nagtitirios kaming mga ca-origan.”