Ex Col. protector kan video karera
DAET,
Camarines Norte - Nagretiro na sa servicio militar na an trabajo
iyo an pagdakop kan mga envuelto sa ilegal na actividad, alagad
iyo na ngonian an protector kan ilegal na video karera.
Nadiscobre pa kan ibang miembros kan media na igwang pigpapahiro
an dating oficial kan militar nganing areglohon an sinambit na
sector na dai ibulgar an saiyang ilegal na actividad.
Igwa nang andam na 40ng units nin video karera nganing ikalat sa
Daet, Camarines Norte, alagad naging marigmat an Daet PNP sa
pangenot ni P/Supt. Antonio Freyra sagcod na naaraman an hiro kan
retiradong colonel na dai paman pigngaranan.
Duwang residencia an nagmamantenir soboot kan fruitgame machine o
video karera sa laog kan residencia kan familia Soriano asin
Abanes.
Pigsombong pa na an nag-ngangaran na Aguilar asin Jalgado an
pigsasabing operator sa banwaan kan Daet na haloy nang pig-rereclamo
kan mga magurang huli kan nababangkagan na nin mga estudiantes
envez na maglaog sa clase.
Enot nang nagpaluwas nin directiva si P/Sr. Supt. Efren Yebra, PNP
Provincial director sa campania contra sa ilegal na sugal alagad
dai mapundo huli kan protecion kan iba man sanang prominenteng tao
asin awtoridad. (Francis Elevado)
