Sa edad na 70ng taon digdi sa kinaban, an kagsurat kan Ilampog, Ilabay (Levy Aureus man giraray!) asin duwa pang pag-iriba digdi sa Bicol Mail nagin mga akusado sa kasong disecato o contempt of court sa reklamo ni Judge Filemon B. Montenegro kan RTC Branch 26 digdi sa Camarines Sur.

Si Joe Perez, an samuyang editor-in-chief, dai nin swerte hinanapan nin kasalan asin kinastigo nin tulong bulan na pagkakulong sa rehas na bakal asin sa pagbayad nin multa sa kantedad na P30 mill: dai nin rekomendadong bail bond!

An samuyang publisher na si Nilo P. Aureus asin an saindong alang-alang na lingkod, sa herak nin Diyos: abswelto!

Maski ngani kami ni Publisher Nilo maogma sa pagigin abswelto, sobra an samuyang pagmundo sa pagka-convict asin pagpamulta ki Joe Perez.

Inabswelto kami ni Judge nin huli sa higot na pag-ako ni Joe Perez, kan siya yaon sa witness stand, na dai kami nin pagka-aram kan sinurat niya sa Bicol Mail kan Hulyo 14, 2005 na: “Money Changed Hands in Naga Ejectment Case” na sabi ni Judge pagratak kan saiyang reputasyon asin pangaran!An nasambit na artikulo manunungod sa ejectment o pagpahali kan Heirs of Mariano sa Naga City Hall asin iba pang upisina kan gobyerno sa maabot limang hektaryang daga na, soboot, pagsadiri pa kan pamilya Mariano sagkod sa ngonian nin huli ta, soboot, dai nin donation papers.

An reklamong contempt of court isinangat sa husgado Lunes, Hulyo 18. Nagka-igwa nin pagdangog o hearing: Miyerkules, Hulyo 20. Pagkahapon: igwa na nin desisyon!

Kastigo para ki Joe Perez: 90ng aldaw na pagkakulong sa rehas na bakal asin pagbayad nin multa sa kantedad P30 mil, dai nin rekomendadong bail bond. Si Nilo asin Levy Aureus, abswelto!

Sabi kan mga paramasid: Kutana arug kaini kadali an pagdangog kan mga kaso sa husgado. Magigin maogma an mga Pilipino!

Mapapara na padagos an reklamo kan iba na digdi sa Pilipinas garo baoo kun maghiro an husgado. Mala ta kun an kasong sexual harassment na reklamo ni Maria Clara kontra ki Padre Damaso digdi ginibo, posible si Padre Damaso yaon pa sa kumbento naghahalat na matapos an pagdangog kan saiyang asunto!

Sobra man an sakuyang kahandalan na ako tibaad makalaog sa kulungan. Magugutom an mga ataman kong orig, dai nin mabahog. Sobra talaga an sakuyang pagkahadit sa mga ataman kong orig.

Padangat ko pati an sakuyang mga ataman na orig. Ta sabi baga ni Fr. Philip Francis Bersabe: “Para sa saimo sinda mga baktin; Alagad para sa sako sinda mga birhin”!

Dios Mabalos, Joe Perez, sa pagsalbar mo samuya sa kalabos!

Dai bali kun makulong ka, makalibre sana an saimong pag-iriba. Iyan si Joe Perez: an bagogn heroe kan media sa Bikol ngonian!

Mabuhay ka! Dios mabalos!