LMP CSur baranga sa pagsuporta ki PGMA
17 sa
35ng alcalde kan Camarines Sur an nagpahayag sana nin suporta ki
Presidente Gloria Macapagal-Arroyo sa tahaw kan inaatubang na
crisis politica kan saiyang administracion sa paghurot na
magdemiter na sa puesto huli kan “Gloriagate scandal.”
Pinangenotan ni Alcalde Mel Gaite kan Baao, Presidente kan LMP
Camarines Sur Chapter asin ni Alcalde Elmo Bombase miembros kan
LMP national directorate. Kadakli kan mga alcalde na dai nag-iba
pasiring sa Malacañang iyo si mga alcalde sa tercer distrito na
kaalyado ni Congresista Noli Fuentebella.
Pigbuyagyag ni Gaite na nag-invitar siya sa mga alcalde sa Partido
area nganing magpahayag nin suporta ki GMA, alagad si kakampi ni
Fuentebella an nagsayuma na mag-iba sa grupo huli ta tibaad
maangotan sinda kan congresista.
Pigpahimotikan man ni Gaite an reclamo ni Alcalde Gil Pacamara kan
San Jose, Camarines Sur na an decicion kan LMP sa pagsuporta ki
GMA mayong consultacion sa mga miembros envez mala ngani mayoria
sa mga alcalde kan Camarines Sur an nagpahayag pa ngani nin bilog
na pagsuporta sa liderato ni Presidente Arroyo.
Dawa na ngani an LMP Camarines Sur chapter an nagsasabi na
kaipuhan pang ipadagos an suporta ki GMA huli ta mas lalong ma-aafectaran
an economia kun mabago naman nin administracion an ibang alcaldes
na habo nang magpasambit kan saindang pangaran nagsabi na halaton
na sana an resulta kan isasangat na impeachment case contra sa
Presidente.
An mga alcalde na kaalyado ni Fuentebella kinababalihan ninda;
Rosito Velarde kan Tinambac, Edmundo Simando kan Garchitorena, Gil
Pacamara kan San Jose, Jaime Deleña kan Presentacion, asin Asela
Maria Floreco kan Lagonoy. Si ibang alcalde na nasa partido de
administracion an dai nakakaatendir sa dai pa maaraman na dahilan.
Sinda Alcalde Jesse Robredo kan Ciudad nin Naga asin Madel Alfelor
Gazmen an dai na nag-atendir nganing magpahayag man nin suporta ki
GMA.
An tuyaw lang kan iba huli ta bako man voluntad an pagvisita sa
Malacañang envez pigsasadol na magpahayag nin suporta ki GMA
siring kan iba pang mga organisacion.
