Tension sa Brgy. Bicalin nagkulpa na
PRESENTACION, CSur - Nagkulpa na an tension sa Barangay Bicalin sa
banwaan na ini matapos kan mga sunod-sunod na encuentro nin mga
miembros kan militar asin rebeldeng NPA kan nakaaging semana na
pigpahayag tolo an mga nagadan sa lado kan mga rebelde.
Si enot na mga aldaw kan ralaban kan militar asin NPA nag-evacuar
si mga pobreng residentes sa centro kan banwaan asin si iba sa
saindang mga sadiring tao nganing makaibitar sa mga layas na bala
kun nagkaka-igwa nin purotokan.
Si Alcalde Jaine Deleña nagsabi na saindang pigtawan nin relief
goods si mga evacuees sa pigdesignar na evacuation center, alagad
dakul na an nagbaralikan sa saindang residencia mientras na
afectado na an saindang hanapbuhay sa agricultura.
An tropa kan 42nd Infantry Battalion kan Philippine Army iyo an
nagconducir nin operacion laban sa mga rebeldeng NPA sa sinambit
na barangay kaya ngani mas naglangkaw si tension kan mga
residentes ta may mga soldados na puedeng sagopaon kan mga rebelde.
Sa ngonian sinabi ni Lt. Col. Serapin Raymundo, oficial na
parapahayag kan 9th Infantry Division kan Philippine Army na
nagpapadagos giraray an operacion kan militar huli kan report na
igwa pang mga nagtatagong mga rebelde.
Nagbugtak na nin Army Detachment an 42nd Infantry Battalion sa
Barangay Bicalin kaya ngani naoogma na an mga residentes, sabi pa
ni Raymundo.
An jefe ejecutivo local nagpaliwanag na dai man ma-coconsiderar na
influence barangay an Bicalin sa mga rebeldeng NPA asin kun igwa
man nasasagupa an mga militar iyan nag-aaragi sana sa sinambit na
lugar.
Pig-acusar kan militar an mga rebelde huli kan padagos naman kan
saindang pag-imponer nin revolutionary tax sa mga pobreng
residentes kan barangay.
Kaya ngani digdi napiritan an militar na magpadagos kan saindang
operacion huli kan sombong sa presencia kan mga armadong NPA.
