Wanted person natalikop kan polis
DAET,
Camarines Norte - Natalikop na kan mga miembros kan awtoridad an
sarong intsik na haloy nang “wanted person” na may pendienteng
casong panlulupig an nadakop sa Ciudad nin Iriga kan Julio 15,
2005.
An suspechado pigbistong si Bernard Sy, 25 anyos, soltero asin
nag-eerok sa 56 Gov. Crisene Avenue, San Francisco, Ciudad nin
Iriga, inarestar siya mientras na armado an awtoridad nin
mandamiento de aresto na pig-issue ni Juez Ramon Arejola kan
MTC-Daet na may criminal case no. 19260 sa casong panlulupig na
mayong pigrecomendar na fiansa an corte.
Si Sy nadakop mga alas 9:00 nin aga sa Lanling Restaurant sa
barangay San Roque, Ciudad nin Iriga sa pamamayo ni SPO3
Hermogenes Saludes kan Daet PNP sa cooperacion kan policia kan
Iriga.
Mientras tanto, nadakop pa kan policia an sarong nagpapabistong
NPA matapos gibohon an entrapment operation sa paagi nin text
message na naarestar sa kanto kan Taft Ilaod asin Froilan Pimentel
Avenue, Daet, Camarines Norte.
An suspechado si Wilfredo Lorica 44 anyos may agom asin residente
kan barangay Uno-Daet.
Naghagad nin asistencia kan polis an saro sa mga victima na si
Emar David matapos na ini padarahan nin surat kan suspechado na
naghahagad nin P10,000 bilang revolutionary tax sagcod na
nagpatanid na kun dai matao kan sinambit na cantidad may maraot na
mangyayari.
An suspechado nagpapabisto na Ka Roldan na kabali soboot sa grupo
kan Romulo Jallores Command kan NPA.
Tolos nakipag-cooperar an victima sa mga awtoridad asin tinao an
cellphone number kan suspechado nganing maaraman kan victima kun
sain na lugar itatao an sinambit na kantidad.
Marikas na pig-organisar kan 503rd Provincial Police Mobile Group
kan Daet PNP asin nadakop sa operacion an suspechado na nasamsam
an ginamit na cuarta asin marked money, sarong Nokia 3315 asin
tolong sim card.( Francis Elevado).
