Sa naka aguing mga isyu kan kolom na ine pinapaguiromdom an mga local na opisyales kan ciudad na totokan, pag adalan uli, an mga ordinansa na dapat ipasonod kan ciudad arog baga kaidtong para sa BAKANTENG LOTE na dai inaaresikaso. Sana natawan idto nin atensyon nin luhay-luhay sana.

Sa isyong ine kinokolibat ta giraray an mga opisyales kan Barangay asin an ENRO, mga streetsweepers, asin Bantay Kapalibotan on Ord. No. 2003.013 S. 2003) manongod kan ANTI-LITTERING Ordinance No. 2001-056 Section 10.

An ordinansa kayang nasambit nagmamando na an siisay man dai dapat basta sanang mag apon nin ano man na bagay lalo na kon makaka-ati sa tinampo, sa lansangan, sa sidewalk, o asin saen man na lugar pampubliko.

An dapat lang kon iguang dapat iapon maghanap nin basurahan o minsan ngani an mga sasakyan pampubliko dapat may garbage can sa laog kan vehiculo.

Kon ine balgahon nin siisay man, aki man o gurang, babae man o lalake, mayaman o pobre, may adal o dai, gabos iyan kakastigohon kan ordinansa. Sabi ngani sa Ordinansa No. 2001-056 10-9:

Sa enot na pagkadakop - P 500.00 an multa
Sa Ikaduwa na pagkadakop - 1,000.00 an multa
Sa Ikatolo na pagkadakop - 1,500.00 an multa

Pero siisay na sa Naga an dinakop o siisay na sa mga autoridad na tinawan kapangyarihan sa ordinansa an nakadakop? Garo mayo pa po; anas ordinansa; drawing sana; masyado kitang pabaya maboot sa mga parabalga nin ley, habo kitang makakulog; sopog kitang mag implementar kan ley. Dai kita makaarog sa Puerto Prinsesa, Palawan minsan mayor ninda minumultahan. Kaya sinda koyog sa ley, malinig pa an kapalibotan.

Noarin man daw kita makaka-arog kan ibang gobierno lokal? Minsan kita may mga marhay magpasar nin ordinansa, mag isip nin karahayan ”pornada” sana, sayang, kadakol abogado sa Consejo, firming nganing duwa, tolo, apat diyan, pero very poor sa implementasyon. Sorry sa tagasurat na ine, ta iyo man ngani kan yaon siya diyan.

Anti-littering ordinance nagpoon pa iyan kan 1971 firmeng inaamiendahan pinakosog sabi pero sagkod ngonian an pagkaluya iyo an makosog kaine; dai na ipapasonod.

Tawan ta nin ehemplo: an jeepney may mga lunad nin estudyantes nag agui sa J. Hernandez Ave. mga aking lalaki o babae nagkakarakan nin junk food mariribok duwang aking babae asin lalaki segurado akong haiskolano sinda. Pagka ubos si laog kan sopot na kakanon oto na inapon sa lobot kan jeepney si patos may puti may pula sa tinampo naglitong litong ramog na sa tinampo.

Tinoyaw kan nakasunod na nakaheling sainda tiniwian pa si nagtuyaw oto na si jeepney kantyaw lang nakoa kan boot mag sunod sa ordinansa. Dai man kaya seriosong sinumbong, mayo man autoridad na masuporta saiya.

Iyo ine an enforcement na dai ta nakakaya. Noarin daw kita magkakaigua nin tunay na disiplina, pagpasunod kan ordinansa sa kalinigan kan kapalibotan anti-littering lalo na?.