FLETE SA TRIMOBILE:
P1 dagdag na flete aaprovaran kan SP
AN
Committee on Public Utility kan Sanggunian Panlungsod marecomendar
na sa en banc session kan Sanggunian sa maabot na Lunes Agosto 1,
2005 matapos favoran kan 90 por ciento kan manlaen-laen na
sectores sa ginibong public hearing kan Viernes (julio 22) an
P1.00 dagdag na flete envez kan P2.00 na peticion kan organisacion
nin mga para trimobile sa Ciudad nin Naga.
Tinapos na kan Public Utility Committee sa pamamayo ni Consejal
Jose Grageda an saindang decicion sa saindang huring miting
nganing isumiter na sa session regular na piglalaoman na fafavoran
kan mga miembros kan consejo.
Sinabi ni Grageda maninigo na an pesong dagdag na flete huli ta
magabat na sa pasajeros an P2.00 sa atubangan kan crisis sa
economia asin dai man naglalangkaw an sueldo kan mga empleados kan
gobierno asin privado kun igwa man iyan kulang pa sa flete
aro-aldaw.
Insistido an trimobile sector sa pamamayo ni Rafael Duque P2.00 na
dagdag na flete huli kan mga sunod-sunod na paglangkaw kan precio
kan producto nin petrolio.
Ma-efecto an dagdag na P1.00 flete matapos kan 15 dias na
ipublicar sa periodico local. Magiging nang P6.00 an flete hali sa
dating P5.00 na enot nang inaprovaran may duwang taon na an
nakakaagi.
Pig-aadalan kan comite kun maghuros an precio kan gasolina dapat
magpababa man nin flete ini sa recomendacion kan Transport Traffic
Management Office (TTMO) sa pamamayo ni Joselito del Rosario na
dai man ini pigcontra kan lideres kan organisacion nin para
trimobile kan gibohon an public hearing kan nakaaging semana.
An dagdag na flete sa trimobile sa Ciudad nin Naga saro naman sa
pasakit sa mga pasajeros matapos enot naman nagpalangkaw kan
saindang tarifa an jeepney kan bulan nin Junio.
