“Less talk, less mistake”.

Iyan an ginamit na formula ni Gloria sa saiyang State of the Nation address (SONA) sa Batasan Pambansa kan Lunes na hapon, Hulyo 25, ngonian na taon, sa atubangan kan Joint Session kan Congress.

Nag-boycott an siyam na senador sa minoria; sa 14ng senador sa mayoria, saro sana an nag-abot: si Joker Arroyo; sa 28ng congressman sa minoriya, 19 an dai nagtunga!

Hinakot sa Batasan complex kan Malacañang asin mga congressman an sobra sa tres mil na mga VIPs asin special guests kaiba an 70ng mga ambassador; 60ng justices kan Supreme Court asin Court of Appeals; 50ng mga gobernador; mga militar asin police officers; asin ginatos na mga local officials.

An Sona haliputon, naglawig sana nin beynte dos minutos, kaya diit an nakadangog. Ginibo gabos sa tataramon na English kaya si nakadangog dakul an dai nakasabot.

Diit sana an tinaram ni Gloria kadaklan pa mga kaputikan. Halimbawa :

Kuwatro mil (kono) na mga Pilipino an nagka-igwa nin trabaho sa laog nin apat na taon;; an economy daa ma-take-off na; nakakabayad na daa nin utang kaya puwede na naman mag-utang; treynta milyon na Pinoy an nagka-igwa nin health insurance; nagbawas na an kidnap-for-ransom asin kaso nin mga illegal drugs; solved na (kono) an problema sa MILF asin insurgency; nakakabawi na an Philippine peso sa merkado.

Baranga (kono) an mga Pilipino sa ngonian: Pinoy na yaon na sa pag-asenso asin mga Pinoy na yaon pa sa kankungan!

Totoo, duwang klase an Pinoy sa ngonian na administrasyon ni Gloria: Pinoy na basug sa poder; pagbuhay asin kaugmahan; asin Pinoy na sobra an pagtios: dai nin trabaho, dai nin pagbuhay, dai nin kaogmahan, dai nin ipabulong, dai nin maipalubong!

- o0o -

Treynte y tres na veces tinawan nin rounds of applause an Sona ni Gloria na igwa pa nin limang standing ovation. Si Speaker JDV bako na palan speaker kundi prompter: natindog, naupak, nakurahaw, natukaw. Inaarog kan “palakpak brigade” kan congress: natindog, naupak, nakurahaw asin natukaw. Mantang si Drilon: dai nin girong sa pagkatukaw, dai natindog, dai naupak, dai nakurahaw. Murusdot an angog nagmamasid sana ki Gloria asin De Venecia!

Sa kagabsan, si Speaker De Venecia asin an kada miyembro kan “palakpak brigade” kan congress nag-upak nin 45,600 na upak sa laog nin beynte dos minutos na pagtaram ni Gloria. Nakisawsaw man sa pag-upak an 3,000 mil na mga VIPs asin special guests.

- o0o -

Nagluwas an Sona na grand reunion kan mga buaya: buaya sa kuntod asin buaya na lubog sa tubig. Nagka-igwa nin ballroom dancing an tugtog asin bayle saro sana: Mambo Chachacha!

Nagkanta an soloist na star kan Gloriagate background si FVR asin JDV kaiba sa pagkanta kan Mambo Chachaha an mga alipores na congressman.

Sa ballroom dancing nagin mga DI an mga congressman, mga cabinet secretary, mga military asin police officers. Nagin mga partner an mga nakaternong mga agom kan mga buaya. Naki-ballroom man an mga ambassador, justices, mga gobernador asin mga local officials.

- o0o -

Totoo palan an bareta na si Gloria asin Mike A kan Juetengate bakong mag-agom!

Sabi baga ni Susan Roces; “An putikon tugang kan parahabon”!

Si Gloria putikon, si Mike A. parahabon: di bakong mag-agom, kundi magtugang!