PMA na-alarma na sa kakulangan doctors
Hagad sa gobierno dagdagan an sueldo
AN
Philippine Medical Association (PMA) an na-aalarma na kan
pagkulang-kulang na nin mga doctors sa manga hospital kan gobierno
nagdedemiter sa saindang trabajo nganing magpadagos sa pag-practice
kan saindang profession sa luwas kan nacion.
RAÑOLA
Si Dr. Jose “Sonny” Rañola, Presidente kan Camarines Sur Medical
Society, Inc. (CSMSI) hali palang sa pakikipag-conferencia sa mga
oficiales kan PMA sa Manila nagsabi na an Board of Directors
nakatalaan na magpasar nin resolucion nganing hagadon sa gobierno
na langkawan an sueldo, tugotan na mag-practice kan saindang
profession pakatapos kan office hour asin iba pang benificio
nganing dai mapiritan an mga doctor na mag-trabajo sa hospital sa
ibang nacion.
An mga hospital kan gobierno sa manlaen-laen na region an
binabayaan na nin mga doctors mala ngani an iba nagka-clase pa nin
nursing tanganing magtrabajo sa abroad na mas halangkaw an sueldo.
Kinakaipuhan nang mag-accion an gobierno sa sinambit na problema
huli ta an servicio sa salud importanteng marhay bako lang sa mga
hospital kan gobierno huli ta kun mayo na nin mga doctor an
hospital, dai na ini maapod na hospital envez clinic na sana, sabi
pa ni Rañola.
Sa na-enot na entrevista kan Bicol Mail ki Dr. Ruben Peñafiel,
director kan Bicol Medical Center pig-confirmar kaini na maabot sa
30ng mga doctor an kulang na sa saindang hospital dakul an vacante
mayo nang aplicante mientras na pigprioridad na magtrabajo na sana
sa luwas kan nacion.
An public health doctor nagrerecibe sana nin P20,000 cada bulan
kakaltasan pa nin withholding tax asin iba pang mga deduction an
sainda na sanang take home pay mga P10,000 asta P12,000.00.
An mga hospital sa United Kingdom, Estados Unidos de America asin
iba pang nacion nag-oopresir nin sagcod sa P200,000 cada bulan.
Pinahayag kan ibang mga miembros kan CSMI na an gobierno dai
makakapugol kan mga doctor, nurses na magtrabajo sa ibang nacion
kaya dapat ma-actuaran maghaman nin mga programa sa salud orog na
mapalangkaw an sueldo kan mga doctor.
An kakulangan nin mga medical doctors nangyayari na sa mga
district hospital maging kan mga darakula pang hospital kan
gobierno mala ngani an Bicol Regional Training and Teaching
Hospital sa Ciudad nin Legaspi binayaan na nin 17ng doctors.
Aram na kan Department of Health (DOH) kan panahon pa ni dating
Secretary Manuel Dayrit an mga pagkulang kulang na nin mga doctor
sa hospital kan gobierno alagad mayo man nin ginibong accion.
