Caso vs 2 tesorero pinalibre kan GSIS
KUN
dai pa nagpatanid an Government Service Insurance System (GSIS) na
maatubang nin caso administrativo an arin man na oficial kan local
na gobierno na dai nagreremiso kan premium contribution, an LGU
Balatan asin Presentacion an pig-areglar na an saindang mga
obligacion sa paagi kan saindang kasundoan na babayadan na an mga
morosidad.
Si Marina Mallari, branch manager kan GSIS sa Ciudad nin Naga
nagsabi na dai na ninda idadagos an planong pagsangat kan sinambit
na caso contra sa tesorero municipal na sinda, Tesorera Amalia
Martinez kan LGU Balatan asin ki Benjamin Presintacion kan LGU
Presentacion.
An record kan GSIS an Balatan igwang babayadan na P1.9 milliones
para sa taon 2004 asin 2005 mientras na an LGU Presentacion
cantidad P1.1 milliones, nagbayad pa sana sinda nin partial alagad
dai naman pigbuyagyag ni Mallari kun pera pa sana an pigbayad.
Sinda alcaldes Jaime Villareal kan Balatan asin Jaime Manghay
Deleña kan Presentacion parejong nag-asegurar sa mga empleados kan
saindang municipio na babayadan an sinambit na mga obligacion sa
GSIS.
Na enot, kaini pigpahayag ni Ms. Delia Saltarin parapahayag kan
GSIS Naga Branch na tolong veces nang pigpadarahan nin noticia an
tesorero municipal kan sinambit na duwang LGU, alagad padagos na
nagsisinutil na magsimbag kun noarin ninda babayadan an mga
obligacion na pigkaltas na sa mga sueldo kan mga empleados.
Dai maipaliwanag kun sain ginamit an fondo sa premium contribution
na hali man sana sa contribucion nin mga empleados na dapat
pigremiso tolos nganing maka-aprobetsar an mga empleados kan
saindang mga benificio.
Puede nang maka-sumiter nin aplicacion kan saindang salary loan,
alagad defende sana sa pigremiso kan duwang LGU.
An Acta Republica 8291 nagsasabi an arin man na oficial kan
agencia de gobierno na dai nagreremiso kan mga premium
contribution kan mga empleados oras na maprovaran na nagkasala
puedeng mafinaran nin suspension asin an magabat na castigo iyo an
perpetual disqualification na magtrabajo sa arin man na agencia de
gobierno.
Nagkapera pang mga agencias de gobierno an nagfirma naman sa
kasunduan na saindang babayadan utay-utay si mga obligacion sa
premium contribution nganing makaibitar sa ano man na caso base sa
RA 8291.
