Casureco II mapalangkaw naman tarifa
NAGLANGKAW
na nin P.55 an tarifa sa corriente cada kilowatt hour kan
Camarines Sur II Electric Cooperative (Casureco II) Inc. kun
idagos an implementacion kan E-VAT sa mga cooperativa nin
corriente igwa naman na sunod na papasanon an mga consumedores.
PANTE
Si Rolando Pante, institutional service department manager kan
Casureco II nagconfirmar sa mga miembros kan Sanggunian Panlungsod
kan Ciudad nin Naga na kun nabigla an mga miembros consumedores
kan cooperativa sa dagdag na 55 centavos kulang pa ini huli ta
tatamaan pa an gabos na mga electric cooperative kan diez por
ciento singil sa E-VAT.
Kun dai nag-issue nin temporary restraining order an Corte Suprema
contra sa E-VAT ini nag-efecto na kan Julio 1. Si Pante dai paman
makatao kun pera naman an papasanon na dagdag na tarifa sa
corriente.
An Sanggunian Panlungsod naghagad nin paliwanag sa Casureco II kan
biglang pagralangkawan kan electric bill kan nagtalikod na bulan.
Sinabi kaini kun igwa man nin pagpatong na P.55 iyan hali sa
generation corporation kan Transco na pigpasa man kan mga
cooperativa sa mga consumedores.
Sa ngonian an Casureco II cantidad P6.69 an singil sa cada
kilowatt hour dai pa kabali an dagdag na P.55 kun sa sumada igwa
nang total an P7.24.
Si APEC Party-list Representative Ernesto Pablo nagpahayag na sa
pag-efecto kan E-VAT dagdag na 56 centavos an ipapasa naman sa mga
consumedores ini sa diez por ciento pa sana. Sa sunod na taon
magiging doce por ciento an E-VAT an mangyayari magiging nang
P.86.
An aviso na sana kan cooperativa huli ta an nagpapalangkaw kan
tarifa sa corriente iyo an mga pinapatong kan Transco, dapat
magtipid na sana sa tahaw kan inaatubang na crisis sa ngonian sa
economia.
