Gaite, dai pa raya sa mga pag-iriba sa LMP
BAAO,
Camarines Sur - An League of Municipalities of the Philippines (LMP)
Camarines Sur Chapter sa liderato ni Alcalde Mel Gaite kan banwaan
na ini magpapadagos sa pagpa-apod nin regular na meeting dawa enot
nang pig-snab kan mayoriang mga alcalde an pigtalaan nindang
miting kan Junio 29 sa Siruma, Camarines Sur.
Dai pa raya si Gaite, mala ngani pigcalendario an sunod na regular
meeting sa Julio 29, 2005 sa Ragay, Camarines Sur na an
presentador iyo si Alcalde Renato Aquino.
Pito sanang alcalde si nag-atendir sa meeting kan LMP sa municipio
kan Siruma kaya ngani nagpaliar an Camarines Sur sa pagpasar nin
resolucion para sa “full support” ki Presidente Gloria
Macapagal-Arroyo sa tahaw kan nagkukusog na Resign Movement contra
ki GMA. Ini matapos saiyang akoon asin naghagad nin sorry sa isyu
kan “Gloriagate tapes controversy.”
Pig-ayon sana sa agenda an sinambit na pagpasar nin resolucion ki
GMA, alagad piglinaw kan presidente kan LMP na an mayor na agenda
iyo an pagpasar nin resolucion na huroton sa congreso na ma-enmiendahan
an nagkaperang provicions kan Government Procurement Reform Act
(RA 9184) na iyo an nagpapadificil sa mga LGU sa pagbakal nin mga
supply asin iba pang mga materiales na kaipuhan tolos kan mga
LGUs.
Napag-araman na an ibang mga alcalde dai interesadong mag-atendir
huli kan plano na magpasar nin resolucion sa pagpadagos sa
pagsuporta ki PGMA huli ta kun mapabagsak sa puesto an Presidente
mas lalong mabibisto an LMP Camarines Sur kun sain kakamping
partido.
Alagad nag-insister si Gaite na segundario sana man an sinambit na
planong resolucion an prioridad iyo an resolucion sa pag-enmienda
kan RA 9184.
Kabali pa sa planong resolucion iyo an pag-indorsar sa Congreso na
legalisaron na sana an sugal na jueteng magkaka-igwa pa nin mga
trabajo an residentes kan barangay na magiging colector sagcod na
igwa pang dakulang ingreso an gobierno.
Sinda na-enotan na kan mga gobernador sa Bicol sa pagtulod na
gibohon nang legal an sinambit na sugal.
