Statement of support kan
ULAP ki PGMA pigtuyaw
Mayong consultacion sa mga
miembros
SAN
JOSE, Camarines Sur - An pinaluwas na Statement of Support kan
Union of Local Authorities of the Philippines (ULAP) decicion sana
kan executive board dai kaipuhan na gamiton an pangaran kan
organisacion huli ta mayo nganing ginibong consultacion sa mga
miembros.
PACAMARA
An ULAP, sarong umbrella organization kan gabos na oficiales
local, alagad nongka ngani nagpa-apod nin meeting nganing magpasar
nin resolucion o maging statement of support ki Presidente Gloia
Macapagal-Arroyo sa pag-sorry sa saiyang pigsabing “lapsed in
judgment” kan Gloriagate tapes controversy.
Ini an comentario ni alcalde Gil Pacamara kan San Jose, Camarines
Sur mientras na pigbabandillo pa ngani an sinambit na statement of
support kan ibang mga oficiales local.
Si bise gobernador Jesus Calisim kan provincia nin Albay pigbasa
pa an sinambit na suporta ki GMA sa ginibong session regular kan
Sanggunian Panlalawigan kan Junio 28 dai lamang hinapot an mga
oficiales local kan saindang provincia kun pigconsulta sinda kan
sinambit na decicion.
An League of Municipalities of the Philippines (LMP) Camarines Sur
chapter nagtalaan kan saindang sunod na meeting sa Julio 29,
kabali sa agenda iyo an pagpasar nin resolucion para sa “full
support” ki GMA. Ini saiyang cocontrahon asin mapahayag kan
saiyang opinion sa mga rasones na dapat simbagon muna an salang
naginibohan sa namamanuan Filipino.
“Madaling magpatawad, simbagon muna an nacomiter na kasalan,” sabi
pa ni Pacamara.
Si regular meeting kan LMP Camarines Sur chapter kan Junio 29,
2005 sa Siruma, Camarines Sur na kabali sa oorolayan iyo an
pagpasar kan sinambit na resolucion dai uyon an ibang mga alcalde
ta tibaad mapatalsik man sana si GMA kaya ngani dakul an dai nag-atendir
asin mayong quoroum an meeting.
An sentimiento ni Pacamara pigsuportahan man kan iba pang mga
miembros kan LMP sagcod na ipaabot ninda an sinambit na isyu sa
executive board kan ULAP.
Mientras tanto, si Engr. Jose Chito C. Milante, bise alcalde kan
banwaan nin San Jose nagsabi man na maging sa Vice Mayors League
an dai sinda pig-papa-aram kan mga hiro kan saindang national liga.
Sa Philippine Councilors League (PCL) mayo paman nagpapa-apod nin
tiripon sa pagpasar nin resolucion sa pagsuporta ki GMA kun igwa
man iyang mayong consultacion sa mga miembros. Ini an pahayag ni
Consejal Audie Concina huli ta posibleng piggagamit sana an mga
Liga organization kan ibang mga politico na kaalyado ni Presidente
Arroyo.
