Rabus para sa paglinig guibohon

na nin tagabarangay


Maogmang pagmasdan maheling an mga taga barangay digde sa Ciudad nin Naga na tarabang-tabang boronyog naglilinig sa mga canal , sa gilid kan tinampo sa laog kan zona ninda na katabang mismo an mga Kagawad ninda sa Barangay. Pitong zona, pito man na grupo lakop sa bilog na barangay. An apod ninda kaine, RABUS daa para sa Kalinigan kan Kapalibotan . Bako man po na bago ine, haloy nang praktis minsan ngani sa mga eskuelahan publiko guinigibo ine, naheheling an cooperasyon kan pag-iriba, kulang gastos sa gobyerno, asin kon igot sa boot an mga nag rarabus dakol an naguiguinibo sa kalinigan kan kapalibotan nin huli ta sadiri man sanang lugar an saindang linilinigan, an mabebeneficiaran sinda man sana, namamasdan pati kan saindang mga kaakian ta kon minsan pati mga jovenes asin mga aki mina ayon sa sinabi nang Rabus.

An problema lang digde ta kon minsan bihira lang mangyari; kon minsan saro sanang beses sa sarong taon, arog ngonian dolot daa sa “Independence day”. Kon dai palan okasyon, mayong rabus, kaya ma ati an gilid kan tinampo, poot an mga imbornal madoot an mga natad, panong ati an mga canal. An magayon kaine kota na kon guibohon nang kinaugalian kan gabos na barangay asin gabos na sitio o zona sa barangay, na magtakda nin sequiera sarong aldaw sa sarong bulan asin ta ayonan kan gabos na “able bodied” na residentes kan barangay asin sitios kan barangay magin babae o lalake man, gurang ta joven, mayaman ta pobre anas mag rabus; mamatean an kapagalan, madama man an kaogmahan na tarabangtabang an gabos para sa karahayan asin kagayonan, kalinigan, kan kapalibotan. IYAN AN RABUS NIN BANWAAN, AN RABUS NIN BARANGAY, AN RABUS NIN ZONA SA BARANGAY, PINAPAMAYOHAN KAN MGA KAGAWAD NIN BARANGAY, PATI NGANI SI CAPITAN, kaayon man. Magigin saro nang kaugalian nin gabos na namamanuaan, lalo na kon pinaplano asin pinagkakaoroyonan kan kagabsan... MABUHAY AN RABUS NIN BANUAAN.. IBANTOG , IKORAHAW TA IYAN.