Comelec kulang sa campania
sa pagparegistro nin votantes
DATA CAPTURING MACHINE - Ginagamit na kan Comelec sa
ginigibong registracion nin mga votantes nganing mahali na sa
listahan an mga flying voters asin mapakarhay an record nin mga
votantes.
An Commission on Elections (Comelec) nagpoon nang mag-ako kan mga
calificadong votantes nganing magparegistro susog sa inaprovaran
na resolucion numerado 7463 para sa pagpadagos kan Continuing
Registration of Voters sa paagi kan pag-gamit na kan Data
Capturing Machines (DCM) sa enterong nacion.
Digdi sa Camarines Sur asin maging sa iba pang provincias kan
Kabikolan kulang pa an nakakasabot na mga votantes nganing
magparegistro si nag-eedad na nin 18 anyos asin si dai
naka-registro kan nakaaging regular na eleccion.
Dawa dai dagos an eleccion sa barangay ipapadagos an pagconducir
kan registracion na dapat nagpoon kan Mayo 16, alagad pigsibog kan
Comelec sa Junio 14, 2005.
An mga oficiales de barangay an dai ngani nakakasabot kan pagbukas
na kan oficina kan Comelec para sa pagpadagos kan registracion.
Napag-araman na daing gayo pa nagcacampania huli ta an plaso
sagcod pang Deciembre 31, 2006.
Igwa nang nagkaperang mga votantes an nagpaparegistro alagad
bilang pa sana sa muro. Sa Comelec kan Ciudad nin Naga bibihira pa
an nagpaparegistro alagad kadakli si mga makoa nin passport na
matrabajo sa luwas kan provincia.
An Data Capturing Machines directa nang pigkokoanan nin retrato an
aplicante kabali na an pagkoa nin thumbmark.
Si Atty Noriel Badiola, Acting Provincial Election Supervisor sa
Camarines Sur nagsabi na an pag-gamit na ninda kan DCM mahahali na
an mga dubleng pagparegistro asin mahahali na an mga inaapod na
flying voters sa eleccion.
