SA CASURECO
I
GM Quiñones, mahelig sa puesto
sa paglaog kan IMC
LIBMANAN, Camarines Sur - An manijamiento kan Camarines Sur I
Electric Cooperative, Inc. (Casureco I) andam nang butasan an
pagpadalagan kaini asin ipasa sa Investment Management Contract (IMC)
asin maghelig sa puesto si General Manager Francisco Quiñones
patin iba pang mga oficiales kan cooperativa afuera kan mga
elihidong miembros kan junta directiva.
An pagpasubasta na sana na kaipuhan an capital na P959.8 milliones
kan arin man na corporacion nganing iyo an mag-control kan
financial asin audit.
Piglinaw na bako man na-ngangahulugan na magiging privado na an
Casureco I envez an contrata sa laog sana nin diez anyos.
Nagcocontra an ibang bagohan na miembros kan junta directiva
alagad an mayoria an nagfavor na maging an mga empleados kan
cooperativa nin corriente mala ngani 99 por cientong pigfavoran
huli kan inaatubang na dakulang pagkalugi sa laog na nin
nagkaperang taon.
Maabot na sa P20 milliones an nalulugi kan manijamiento poon kan
bulan nin Enero asta ngonian na bulan sagcod nadagdagan pa huli ta
inaabot nin 26 por ciento an system loss.
Sa 109ng mga Electric Cooperative (EC) sa nacion sa ginibong
pag-aadal kan Castilla sa mga naluluging EC an Casureco I kabali
sa 30ng nag-aatubang sa pagkalugi na kaipuhan na an tabang kan IMC
nganing dai magpara-ruro an kamugtakan kan servicio.
An Castilla, iyo an pigtukahan kan Department of Energy na adalan
na marhay an kamugtakan kan mga EC na mga nagkakarulugi sagcod na
magsumiter kan saindang recomendacion.
An pagbutas ni Quiñones sa puesto saro man sa mga condiciones oras
na laogan na kan IMC.
Mientras tanto, an dagdag na papasanon kan mga ECs iyo an kabali
na sa mga sisingilon kan VAT susog sa inaprovaran na ley ni
Presidente Gloria Macapagal-Arroyo.
An ano man na pag-imponer nin buis sa mga ECs ipapasa man sa mga
miembros consumedores, alagad kaipuhan pa an pag-aprovar kan
Energy Regulatory Comission.
