Paano daw an kinaban kun dai nin Tatay?

Sa totoo sana, si Tatay nakakasurog kun sinusunod asin tinutubod. Alagad, kun minsan, tagulnod kun pasaway orug na kun hadi nin sablay.

Masuwerte an mga aki na igwa nin Tatay:

Sa pagdakula igwang nag-aantabay; sa problema may kadamay-damay; asin may nagpapa-ogma kun napupungaw.

Kun igwa nin daddy na pasaway, pasensyahan. Amigo, madali an pagsangli; ama, Dios an nagpili!

An satuyang ama padangaton. Atamanon asin salidahan na nin diaper kun nag-iihi na sa kalson. Tibaad mangyari man saimo an mag-usmak pag-abot nin panahon.

Igwa nin suanoy na kasabihan: “Like father, like son”: an tanom na balimbing dai mabunga nin parapagulong.

Kun hadi sa jueteng an ama, an pamilya sagkod mga kaakian: mga anak ng jueteng. Igwa nin kabo, kubrador, kuryador asin distributor nin payola para sa mga taga media asin pulis patola.

Kun parainom an ama, buratsero man an mga aki; kun si daddy mahilig sa derby, pagtandayag kan aki seguradong parabolang.

Abogado de kampana asin macho an ama. Pina-eskwela si JR nin abugasiya sa Ateneo de Manila. Pagpuli sa Naga, nakasulot na nin T-Back asin nagtatahi na nin bestida: siyempre kaiba kan mga alangan sa pag-rampa kun bilada magin sa Miss Bicolandia.

Si Jessie igwa nin problema sa kasaruan. Si daddy an nagtatabang ta pareho an kasalan: nagkakawat nin kalayo sa impiyerno.

Maribukon si Nanay, daug si Tatay sa daldal. Pagdakula kan aki, bakla. An ama, pango. An ina, pango man. Nagkasuhayan an mag-agom ta nangaki nin tisoy halangkaw an dungo.

An tultol na padre de familia, orgulyo ni Nanay, idolo kan mga kaakian. An padre na igwa nin pamilya igwa nin problema sa Roma; sa sosyedad igwa pa: an apelyedo kan gabus na aki, kinua sa ina. Dai puwede sa ama ta si Tatay nakasulot nin sutana!

Si Tatay madaling hagadan nin balon sa eskwelahan kun igwa nin mga kahampang. Madaling maanggot, pero madali man maglipot an boot.

Sa ngaran nin romansa, kadaklan kan mga Tatay garo bombilya: madaling palaadon, madali man na parongon. Bakong arog ki Nanay na garo plantsa: kasubago pa nakasaksak sa kuryente, haloy pang mag-init; binulnot na sa kuryente, haloy pang maglipot.

Sabi kan mga kaakian, si Tatay (kono) bungog. Sabi man ni Tatay: paano siya magiging baug, nag-ogbon ngani nin dakul. Igwa talaga nin problema sa pagdangog!

An mga daddy nin huli ta gurang na, rutoy na sa helang: emphysema, diabetes, rayuma, almoranas, stroke, hika, asin hypertension.

Alagad an delikadong helang ni Tatay na, kun minsan, nahuhulog pa sa cancer iyo an inflamed prostate o paggatok kan kasangkapan. An kawsa kan inflamed prostate, may veces (kono) nin huli ta overused an organ; kun minsan, underused; kun dai man, an organ no-more used.

Igwa na nin reseta si doctor na bulong sa inflamed prostate o gatok na kasangkapan: an Virgin of Coco Oil.

Alagad habo si Tatay kan Coco Oil. Si daddy dai nabubulong an helang ta mas interesado pa sa Virgin!

HAPPY FATHER’S DAY!