---

Legalisasyon kan jueteng

iindorsar kan LMP, CSur


AN controvercial na sugal na jueteng na napundo na alagad dai nahahali an posibilidad na liwat naman ining mabubuhay oras na magkulpa an escandalo na kinaka-envueltohan kan mga darakulang politico asin oficiales kan PNP. An League of Municipalities of the Philippines (LMP) Camarines Sur Chapter an mapasar nin resolucion na gibohon na logod na legal an sugal magkaka-igwa pa nin ingreso an mga local na gobierno.

Si Alcalde Mel Gaite kan Baao, Camarines Sur asin Presidente kan LMP nagsabi na an saindang Liga magkaka-igwa kan regular na miting sa Junio 29 na gigibohon sa Siruma, Camarines Sur na kabali sa agenda iyo an pagpasar nin resolucion na huroton sa congreso an paglegalisar na kan jueteng huli ta dai man sana napupundo.

Si Presidente Gloria Macapagal-Arroyo an nagpangako na sa laog nin sarong taon totalmente nang matatapos an ano man na operacion kan sinambit na ilegal na sugal, alagad an iba dai man bensido sa platica kan Presidente. Ini iyo na an pigtutubodan na dalan nganing dagos na ilegalisar an sugal na jueteng.

Dakul na an nakasapog sa mga escandalo sa sinambit na sugal arog ni Presidential son asin congressman Juan Miguel “Mikey” Arroyo asin an saiyang tiyoon Negros Occidental Congressman Ignacio “Iggy” Arroyo, kabali na si PNP Chief Arturo Lomibao, kaya man sana ipapundo kun igwang “political will” an presidente.

Napag-araman ni Gaite na an mga miembros kan LMP an nagfafavor na legalisaron na an sugal huli ta dai man sana mapuropundo nagiging controvercial pa an aracusaran sa pagrecibe nin payola sagcod an distabilization plot contra sa Arroyo Administration.

Igwa man nin ibang alcalde an nagpahayag na dai sinda mafavor nganing hagadon sa congreso na gibohon nang legal an sugal na jueteng.

Pigpahayag pa ni Gaite na kan nakaaging semana sinda sa Union of Local Authorities of the Philippines (ULAP) an nagpasar nin resolucion na pusog pang minasuporta ki Presidente Arroyo sagcod nang pig-cocondenar an ano man na plano nganing patagbangon sa puesto an Presidente.

Tubod siya na an ibang pang mga Liga an mapasar nin kaparejong resolucion para sa paglegalisar na kan controvercial na sugal na jueteng mientras na an ibang miembros kan congreso an favor na gibohon nang legal an sinambit na sugal.