Tama na gayo idtong nadangog kan tagasurat kan colom na ine sa sarong comentarista sa Radio na tanganing mapakarhay an pag asikaso kan basura ta digde sa Ciudad, kaipuhan an DISIPLINA nin mga kagharong lalo na idtong iyo an nag aapon kan Basura aroaldaw. Nasambit kan si comentarista na igua na nin mga patakaran na dapat sunodon an mga kagharong kan pagdispatsar ninda kan basura, arog baga kan mga minasonod: Sa mga aldaw sana nin Martes asin Domingo sa lambang semana magluwas nin DAI NALALAPANG BASURA. Kon Lunes, Miercoles, Hueves, Biyernes, asin Sabado, iluluwas sa pick up points iyo an NALALAPANG BASURA. Malinaw po iyan alagad an talaan na ine iba-iba sa lambang lugar. Kaya kaipuhan bistohon kan mga kagharong sa lugar kon ano an schedule diyan sa lugar ninda asin ine iyo an sunodon na daing paltos tanganing dai matoyawan lalo na dai MAMOLTAHAN sa salang pinag aapon sa aldaw na iyan. Sinasabi man kon anong oras dapat iluwas an basura sa lugar na iyan halimbawa pag alas 8:00 sana nin banggui antes mag agui an Basurerong Trak. Pag nag apon an siisay man sa lugar na iyan nin sala sa oras lalo na kon naka agui na an basurerong trak diyan nangyayari na an basura dai na napupurot kan basurero, natatada sa tambakan lalo na kon halohalo an basura na labag sa pag suruway suway kaine, an mga ayam asin ikos na botas na dai man nalalaom kan kagsadiri, iyo an nagwararak kan basura nagkakalat sa tinampo pagka agang amay mayo pa nin “streetsweepers”, iyan iyo an simbolo kan daing DISIPLINANG pagdispatsar kan basura niato digde sa Naga na sagkod ngonian rampante pa. Ika tolong patakaran na dai pa nasosonod kan mga kababayan tang mabagal magsonod sa patakaran iyo an paglaog kan basura ninda sa SAKO o PLASTIK na bag suficiente pagkadakola na dai maglapwas an laog sa lalagan. An iba na habo lang mag hanap nin lalagan minsan igua man makokoa sa harong, basta sanang ino ola sa tinampo an saindang basura garo baga dai bale sainda an wararak na ati. MAYO MAN GUIRARAY NIN DISIPLINA, sabi kaiyan dai nin kooperasyon para sa karahayan nin kadaklan, siya sana an nasosonod kan gusto niyang gibohon minsan makaraot sa kapalibotan.

Tatawan nin ehemplo kan colom na ine an aroaldaw na naheheling kan tagasurat kan colom na ine diyan sa kanto kan STA. CRUZ PURO corner kan P. SANTOS EXTENSION, Sa lugar na iyan, (Capitan Largo , Pardon the reference), yaon po diyan an halimbawa nin daing disiplina na mga para apon basura. An mga kagharong seguro diyan, na tambak kan basura ninda matangang banggui o ma agahon, naka agui na si basurerong trak, dai na napupurot asin lalo na ta halo halo an basura may nalalapa asin dai nalalapa, an kadaklan pa inoola sana sa kanto sa sidewalk katongod pa sa Imbornal. An nabanggit na katayoan na ine sa Santa Cruz Puro, presente man sa dakol na lugar digde sa Naga kaya minsan kita sa Naga nangengenot na sa marhay na pa aguing pagdispatsar nin basura dakol pa talagang sala sa pagheling dahil sa kulang pa sa DISIPLINA an dakol satong mga kapwa namamanuaan, sa bagay na ine.. Sana man pati AROGON KAN GABOS NA BROADCASTER NIN RADIO PATI NA SA TELIVISION DIGDE SA NAGA AN GUINIBO KAN DWNX NA PAG APELA SA GABOS NA KAGHARONG NA SONODON NA AN MGA PATAKARAN ASIN PAGBOOT KAN ENRO TUNGKOL SA PAG APON KAN BASURA AROALDAW. Dakolang beneficio an makokoa kan Ciudad kon guibohon ine kan gabos na “MEDIA PRACTITIONERS” sa Naga, an pag alok kan mga kagharong na otobon an tamang mga kaasogoan na ine sa WASTE MANAGEMENT..Ano daw DZGE, BOMBO RADIO. DZLL, DWRB, MGA FM STATIONS, MGA TV STATIONS ASIN IBAPA, tabang na po kita gabos.

Sa may kaaguid na katoyohan pinapaaram man sa gabos na taga Ciudad nin Naga na sa ika 19 kan bulan nin Hulyo, 2005, magkakaigua kita digde nin RALAKAWAN O ‘WALK FOR A CAUSE” dolot ki Dr. Jose Rizal sa saiyang ika 144ng Kinamondagan. Mag arayon po kita, hale sa Plaza Quezon pasiring sa Naga Ecological Park sa San Felipe. A las 6: 30 nin aga 5.4 Kilometrong lakaw sana.