---

Beda Priela, para consejal


ARAM na ni Beda Priela na siya an puedeng iribay sa navacanteng puesto ni William Kalaw, nagdemiter bilang miembro kan Sanggunian Panlungsod huli ta saro nang US immigrant.

Andam niyang akoon an bagong responsabilidad sa gobierno local kun iyo an mawot kan mga oficiales local sa pamamayo ni Alcalde Jesse M. Robredo.

Kan enot na semana kan Mayo 2005 an mga miembros kan Sanggunian Panlungsod asin si Alcalde Robredo an nagka-igwa nin closed door meeting sa oficina kan bise alcalde na an saindang pig-orolayan iyo an pag-hanap na nin karibay ni dating consejal Kalaw.

Siyam an nasa listahan, kabali sinda Domingo Claro, Aping Olivan, malou Capucao, Melly de Guzman asin sarong Atty. Borja alagad apat sana an nakabali sa final na pagpipilian na kinababalihan ninda Dave Bercasio, Dr. Sonny Rañola, J. Antonio Amparado asin Beda Priela.

Sa pagdecicion napag-araman na si Priela iyo an mawot na patukawon sa vacanteng puesto, alagad kinakaipuhan na magsumpa muna bilang miembro kan Liberal Party (LP). Si Kalaw, miembro kan sinambit na partido parejo ni Robredo asin mga miembros kan consejo.

Siya an nakatalaan na i-indorsar ki Senate President Franklin Drilon, pamayo kan LP huli ta an na-vacanteng puesto gikan sa kaparejong partido. Pakatapos na firmahan ni Drilon isusumiter na ki Presidente Gloria Macapagal-Arroyo nganing iyo an magfirma kan nombramiento kan bagong consejal.

Si Priela, chairman kan Metro Naga Chamber of Commerce and Industry, Inc. asin dating director kan provincial office kan Department of Trade and Industry (DTI) sa Camarines Sur.

Marurumduman si Priela piglaoman kan mga politico sa Ciudades na saro sa makakaiba sa line-up ni Mayor Robredo kan nakaaging eleccion local. Alagad sa dai inaasahan biglang na echapuera y dagos nang nagpahunod an mahigos na lider civico.