Cam. Sur "jueteng
free" na-Mapalo
AN
JUETENG na nagadan asin mabalik giraray, orgullo ni Sr. Supt.
Romeo Mapalo na “jueteng free” na an Camarines Sur alagad duwang
jefe de policia an na-sacrificio huli ta dai napapundo sa
pigtalaan na panahon an sinambit na sugal.
Alagad natuyawan siya ni Alcalde Jesse M. Robredo kan Ciudad nin
Naga huli ta apesar sa principio nin command responsibility an
duwang mga Chief of Police na sinda Amado Montano kan Tinambac
Police Station asin Cerilo Trilles kan Bato Police Station an
hinali sa saindang mga puesto apesar na dai man magdadanay an
operacion kan jueteng kun mayong bendicion sa mga oficial kan PNP
asin politico.
Kun talagang gustong ipapundo kan PNP an operacion kan jueteng
iyan nangyayari asin kayang iimplementar, sabi pa kan alcalde.
Alagad si Robredo nagdududa na posibleng sa mga maabot na aldaw
mabuhay giraray napundo sana huli kan nagiging mainit na an Senate
inquiry na pigbulgar na an mga pangaran nin mga politico asin
oficial kan PNP.
Dawa na ngani “jueteng free” na an provincia si Mapalo an
nagpatanid sa iba pang mga jefe de policia na oras na igwa naman
mabuhay na sugal na jueteng sa saindang area of responsibility
ciertong haklas tolos sinda sa destino.
Nakasumiter sa saiya nin certificacion na mga jefe de policia asin
firmado kan mga alcalde na natapos na an controversial na jueteng
sa Camarines Sur.
An pigtatawan nin prioridad kan PNP provincial office iyo an
pagpakusog kan campania sa operacion kan mga sindicato sa ilegal
na droga na puedeng maglangkaw an caso huli kan napundo na an
jueteng.
Mientras tanto, sa PNP regional office si Chief Supt. Victor Boco
an hinali tolos sa puesto si Supt. Arnold Revilla matapos maaraman
na nagpapadagos pa an jueteng sa provincia kan Sorsogon na an
gobernador digdi si Raul Lee.
