Jueteng-free na (kono) an Province of Camarines Sur: sabi kan Philippine National Police (PNP)!

Mother kan gabos na joke, joke, joke!

Dai na palan nin “payola” si gobernador, congressman, asin mga mayor!

Joke, joke, joke!

Dai naman palan nin “payola” an regional director, and provincial director, station commander, taga media asin mga pulis patola!

Joke, joke, joke!

An deklarasyon na dai na nin jueteng sa probensiya hali mismo ki Heneral Lomibao, hepe kan PNP.

Nagtubod si Lomibao sa report kan saiyang mga field commander: regional, provincial, station command, na kumpirmado ni gobernador, mga alcalde kan banwaan, mga padi asin mga pastor.

Solamente si Mayor Jesse Robredo asin Arsobispo Leonardo Legazpi an dai nagpirma sa sertipikasyon na dai na nin jueteng digdi sa maogmang lugar.

Si Robredo asin Arsobispo nagtutubod na, totoo, dai nin gogo kan jueteng sa Naga. Alagad maski dai na nin Hapon, dakul pa nin mga guerilya na nagbabaray-basay sa 27ng barangay “style guerilla” na nagkokolekta nin taya sa jueteng. Kaya, paano si Ranara maka-pa-pirma ki Robredo asin Obispo nin sertipikasyon na dai na nin jueteng digdi sa maogmang lugar?

Maski ngani sa Magsaysay dakul pang mga taga media asin pulisya an nagbabantay sa harong ni Allan tanganing maghagad kan monthly payola!
Joke, joke, joke!

- oOo -

Mapupuho sana an jueteng sain man na lugar sa barangay kun an pamilya nin jueteng sa barangay hall mapuho na.

An “Nanay” kan jueteng na si Gloria, sabi dai nagbubulsa maski centavo hali sa “payola”. Kawasa, ipinapakua sa iba!

Kaya dakul an sinasaod na tilapia.

An “Tatay” kan jueteng na si Jose Pidal, milyones an nakukua sa jueteng. Kaya kayang-kayang an pagbayad nin sarong milyon sa kada pagdagos sa hotel pagdakit sa kataid na Isla.

An “Aki” kan jueteng na si Mikey, makibabae na, parasugal pa. Nakikipag-inuman pa. Kun nabalyo sa kataid na Isla, kaiba an pamilya: agom, mga aki, sagkod an mga yaya.

Siyempre, an gabos sa harong ma-uulakitan: an hepe kan tanod, mga pinsan, mga katabang. Sagkod mag-abot sa punto na gabos na sa barangay magin mga parasugal!

Kaya, kaipuhan mapuho na an enterong “Pamilya nin Jueteng” tanganing dai na magdanay an sugal na jueteng sa barangay.

Kun totoo an report na dai na nin jueteng, orog nang matakot: madakul an drug pusher!

Hali sa jueteng, madali an paglipat-bahay nin hanapbuhay: hali sa jueteng, madali an paglipat sa drug pushing.

Parehong ilegal. Mga kabo, kubrador tuod na sa hanapbuhay na dai mapagal. Malipat sana nin lugar asin bagong among: presto igwa na naman nin sumpay-buhay!

Dai ngani harayo na an mga kabo, kuryador asin gabos na nabubuhay sa jueteng magin parahabon. An paghabon kaya iyo an pinaka-pasil na trabaho: dai kaipuhan an diploma, dai nin civil service eligibility, asin dai nin rekomendasyon hali sa mayor.

An importanteng qualification na kaipuhan: makusog an boot asin dai nasusupog. An parahabon ngani puwede pang magin congressman. An parahabon asin congressman, parehong tulisan: magka-iba sana an style.

An congressman, inot, sa eleksyon nadalagan. Pagkatapos kan eleksyon: iyo an paghabon. An parahabon inot, an paghabon. Pagkatapos makahabon: iyo na an pagdalagan!

Joke, joke, joke!