P15 dugang na sueldo
aprovado na kan RTWPB
NAGLAWIG nin sagcod sa duwang aldaw (May 30-31) an deliveracion
kan Regional Tripartite Wages and Productivity Board (RTWPB) sa
Bicol na nahulog sana sa P15.00 an inaprovaran na wage increase
alagad benificio sana sa Cost of Living Allowance na magiging
efectivo pakatapos nin quince dias na ipublicar sa periodico local
na may circulacion sa mga provincias kan region cienco.
An P194.00 na minimum na sueldo sa Ciudades kan Naga asin Legaspi
magiging nang P209.00 mientras na P202.00 sa Ciudad nin Iriga,
Pili, Daraga asin iba pang mga banwaan hali sa dating P187.00
Si pighuhurot kan mga trabajadores na P125 asin P96 sa saindang
peticion pigsikwal sana mala ngani sa katahawan kan mainit na
debate an mawot mangyari kan representante kan sector nin
negociantes sa RTWPB sagcod sana sa P8.00 mientras na an sector
nin mga trabajadores an pigtaya na sana an P30.00 dai pig-fafavoran
kan mayoriang miembros kan Wage Board kaya mayong naginibo ipinako
na sa P15.00
Pigbasura kan representantes kan sector nin negociantes an P96.00
huli ta matao nin kulog payo sa sainda sagcod na mapiritan na
magsara huli ta posibleng malugi o kun dai man magbawas nin mga
empleados.
Si Jose Dizon, representante kan labor sector sa RTWPB nagsabi na
natapos sinda sa mainit na deliveracion sa dagdag na sueldo kan
Mayo 31ng hapon asin pigtalaan na ipublicar tolos sa periodico
local kan Department of Labor and Employment nganing sa Junio 15,
2005 mag-efecto na an Wage Order No. 10.
An argumento kan labor sector sa pagpalangkaw kan sueldo dawa
sagcod sana sa P30 bilang consideracion sa padagos na paglangkaw
kan mga basic commodities, inflation rate sagcod sa flete sa mga
pampasajerong sasakyan.
Discontento an KMU sa naging decicion kan Wage Board asin saindang
pighuhurot na tunawon na an RTWPB. Si Frank Cariño kan KMU-Camarines
Sur nagsabi na an ferming pigfafavoran kan RTWPB iyo an mga
capitalista ferming dijado an mga pobreng trabajadores mas marhay
pang tunawon na an sinambit na junta.
Sinabi kan lider kan KMU na an interes kan RTWPB ferming sa mga
capitalista kaya ngani an saindang grupo naghuhurot na sa Congreso
na tunawon na ini mientras na an saindang peticion na P125 na
across the board salary increase an pendiente na sa Camara-Baja na
nakalusot na sa committee level.
An problema nalang iyo kulang nin suporta kan mga congresista na
mga capitalista.
An RTWPB pinamamayohan ni Abogado Alvin Villamor, OIC kan DOLE kan
region cienco bilang chairman, Director Marlene Rodriguez (NEDA),
vice chairman, Director Jocelyn Blanco (DTI), vice chairman,
Antonio Concepcion asin Marcelo Tan, representantes kan employer,
asin sina Jose Dizon asin si Ludovico Raviz kan labor sector.
