Pantao Port binalikan ni PGMA
INAGURACION
KAN PANTAO PORT - Si PGMA naging visita sa ginibong
inaguracion kan puerto kan May 27, 2005, ika-tolong veces nang
binalikan an proyecto sagcod natapos an Phase I. Retrato sa wala
dinumog nin mga residentes an pagvisita kan Presidente.
LIBON, Albay - Sa mga puerto sa Filipinas an Pantao Port sa
banwaan na ini iyo an haros natawan nin atencion na ferming
navivisita ni Presidente Gloria Macapagal-Arroyo sagcod na natapos
an Phase I kan proyecto.
Si PGMA, liwat nagvisita sa inaguracion kan Pantao Port kan
nakaaging Mayo 27, 2005 asin nag-asegurar na mapabulos nin dagdag
na P140 milliones para sa Phase II kan puerto.
Si Congresista Joey Salceda kan tercer distrito kan Albay na
nakaconsiger nin P530 milliones iyo an nakapatapos kan Phase I
matapos ining enot na visitahon ni Presidente Arroyo an puerto kan
Noviembre 2002 asin kan taon 2003 nagbalik para sa progress
inspection sagcod an ika-tolong pagbalik iyo na an inaguracion kan
dakulang proyecto.
An Pantao Port, naka-atubang sa South China Sea, importanteng
marhay para sa entry point sa Southeastern parte kan nacion, ini
iyo an pinakaharaning lugar pasiring sa Visayas asin Mindanao hali
sa region kan Tagalog asin Bicol.
Pigpahayag ni Salceda na an pagbukas kan proyecto dalan para sa
pagpa-uswag sa lado nin economia huli ta an sinambit na distrito
an pagbuhay iyo an pagsira asin agricultural area.
Durante sa pagvisita ni Arroyo pig-anunciar kaini an pagpaluwas
nin cantidad P170 milliones sa Libon-Pantao Road para sa taon
2006.
Kabali sa pigvisita kan Presidente iyo an Misibis beach resort, sa
Ciudad nin Legaspi na pigdadayo na nin mga turista hali sa ibang
nacion sagcod gikan sa ibang region.
Pakahali sa Pantao Port kan Presidente ini nagpasiring sa Pili,
Camarines Sur na iyo an naging juespe de honor sa ginibong South
Luzon Business Conference sa Convenion Center kan Capitolio
Provincial kan Camarines Sur.
