SA LGU PILI
Anniversary bunos itatao sa empleados
PILI,
Camarines Sur - Maabot sa 276 na mga permanente asin contractual
na empleados kan local na gobierno kan banwaan na ini an marecibe
nin anniversary bonus ngonian na aldaw mientras na padagos sa
pag-andam an mga oficiales local asin empleados kan saindang
actividades sa foundation anniversary celebration sa Junio 6,
2005.
Ini an pig-anunciar kasoodma ni Alcalde Tomas P. Bongalonta, Jr.
na saindang pigtagamahan nin P500 mil pesos gikan sa local na
gobierno. Huli kaini nagpahayag nin kaogmahan an mga empleados
mientras na kaipuhan na marhay an cuarta sa pagpalista kan
saindang mga escuela ngonian na burokasan nin clase.
An 150ng permanenteng empleados an nakatalaan na magrecibe nin tig-a
P3,000 asin sa mga contractual cantidad P1,000.
An cooperacion asin paghigos kan mga empleados kan Municipio nin
Pili, nagdecicion an mga oficiales local na itao na nin amay an
sinambit na dagdag na benificio, sabi pa kan jefe ejecutivo local.
Degarbo an mga actividades na pig-haman kan oficina ni Bongalonta
huli ta ngonian na taon iyo an Golden Jubilee kan Pili bilang
kabesira kan provincia nin Camarines Sur.
An Pili namukna bilang kabisera kan Camarines Sur susog sa Acta
Republica 1336 na pigpadrenohan ninda Congresista Felix
Fuentebella Sr. asin Emilio Tible asin pigfirmahan ni Presidente
Ramon Magsaysay.
Inaabot nin matanga an mga oficiales local sa pamamayo ni
Bongalonta asin empleados sa mga preparacion mientras na bako lang
sa sinambit na aniversario an pig-aandam envez pati na an maabot
na ika-107ng Philippine Independence Day sa Junio 12, 2005.
