2 tesorero municipal kakasohan kan GSIS
Sa
kawaran remiso kan premium contribution
NAUBOS na an mga patanid kan oficina kan Government Service
Insurance System (GSIS) contra sa Tesurero Municipal kan Balatan
asin Presentacion, kan provincia nin Camarines Sur na dapat
iremiso na sa tamang panahon an mga premium contribution kan mga
empleados kan duwang LGU.
Accion legal na an gigibohon kan sanga kan GSIS sa Ciudad nin Naga
sagcod na sangatan nin caso administrativo asin puedeng masuspendi
asin mahaklas sa servicio an tesurero municipal sa sinambit na
banwaan o arin man na empleados na iyo an in charge sa remittance
kan mga premium contribution sa GSIS nin mga empleados kan
sinambit na LGU.
Si Delia Saltarin, oficial na parapahayag kan GSIS Naga Branch
nagsabi na tolong veces nang pigpadarahan nin noticia si Tesorera
Amalia Martinez kan LGU Balatan asin si Tesorero Ben Presintacion
kan Presentacion kan saindang Legal Counsel na si Abogado Henry
Gerald Isaac, alagad mayong kasimbagan kun noarin ma-remiso kan
mga contribucion nin mga empleados sa sinambit na agencia de
seguro. Enot na accion kan GSIS iyo an pagsuspendi kan pag-proceso
kan mga benificios kan mga empleados kan duwang LGU.
Susog sa Acta Republic 8291 an arin man na oficial kan agencia de
gobierno na dai nagreremiso kan mga premium contribution kan mga
empleados oras na ma-provaran na nagkasala puedeng sampalingon nin
suspension sa saindang oficina o kun dai man perpetual
disqualification na magtrabajo sa arin man na puesto sa gobierno.
An record kan GSIS an LGU Balatan igwang obligacion na P1.9
milliones asin an LGU Presentacion, P1.1 milliones. Ipinahayag na
an LGU Balatan poon kan Enero 24, 2004 asta kan Abril 2005 mayong
remittance mientras na an Presentacion - Enero asta Mayo 2005.
An reglamento kaipuhan cada bulan an mga pigkakaltas na sueldo sa
mga empleados kan gobierno i-remiso tolos sa oficina kan GSIS.
Huli kaini, afectado man an mga benificio kan mga empleados kan
sinambit na duwang LGU.
Pighahalat kan Legal Counsel kan GSIS an paliwanag kan LGU Balatan
asin Presentacion sa dai pagremiso kan sinambit na premium
contribution, mayong kasimbagan kaya maatubang na sinda nin accion
legal.
Kabali pa sa suspendidong mga agencia sa pagproceso kan saindang
benificio iyo an mga oficina kan National Irrigation
Administration sa Cagaycay, San Jose, Camarines Sur;
Libmanan-Cabusao; Magarao; asin NIA Daet/Talisay kan Camarines
Norte, asin Calabanga Water District.
Sinda an nakalibre sa accion legal huli na igwang Memorandum of
Agreement sa pagbayad kan saindang mga obligacion sa GSIS.
