Gibohan armas, sinakyada kan Calabanga PNP
HANAPBUHAY
NI RANCES TINAPOS NA KAN PNP - Si Ramon Rances (nasa itaas na
retrato) may kabatiran sa paghirahay asin pag-gibo nin armas
nanghihinayang kan saiyang trabajo matapos sakyadahon kan mga
awtpridad an mga ekipahes kaini sa mga badil. (retrato cortecia
kan Calabanga PNP)
Si
Ramon Rances nasamsaman nin mga armas kan polis an yaon na sa
carcel an naglolokob na sa mga nagvivisitang media na makoa nin
entrevista sa saiya asin nagrarason na hanap buhay niya an
paghirahay nin armas. Sa enotan na retrato si brgy. kgd. Joel
Pajaera nasamsaman nin sarong M-1 garand riffle dai maipaliwanag
kun tano ta igwa siyang saray na armas kaini apesar na an original
na nag-gagamit kan garang riffle mga miembros kan Cafgu.
CALABANGA,
Camarines Sur - Sinakyada kan miembros kan Municipal Police
Station sa banwaan na ini sa pamamayo ni Chief of Police Jonathan
Galang an residencia kan gibohan nin “sumpak” na badil asin
hirahayan nin mga armas sa barangay Pagatpat mientras na armado
nin search warrant an awtoridad na pig-isyu ni Juez Filemon
Montenegro kan RTC sa Ciudad nin Naga.
An nadakop na suspechado sa saiyang residencia iyo si Ramon Rances,
35 anyos sa ginibong operacion kan policia kan Lunes (Junio 20)
mga alas 9:00 nin banggi asin nasamsam an apat na mga calibre 22
na paltik, duwang 38ng revolver smith & wesson na mayo nin mga
serial number, mga dai pa tapos na ginigibong handgun, mga bala
kan kalibre 22, 38 asin 45, duwang pidasong disconnector sa
shotgun, drill sits asin iba pang ekipahes sa paggibo asin
paghirahay nin mga armas.
Matapos kan ginibong operacion sa residencia ni Rances, mga alas
5:00 nin aga kan Martes saindang sinakyada an residencia ni
barangay Kgd. Joel Pajaera kan brgy. Balombon asin naconfiscar an
sarong M-1 garand riffle na dating gamit nin mga miembros kan
CAFGU.
Sa investigacion kan policia si Rances nag-ako na haloy na sinda
envuelto sa paghirahay asin pag-gibo nin armas na pigpamana sana
kan saiyang ama. Ini iyo na an saindang hanap buhay.
Si Kgd. Pajaera, nagsabi na kun igwa man siya kan M-1 garand
bilang proteccion sa saindang familia alagad mayo man nin licencia
dai maipaliwanag kun pano siyang nagka-igwa kan sinambit na armas
huli ta ini kan panahon ni dating Defense Secretary Renato Revilla
pig-supply an garand riffle sa mga miembros kan CAFGU sa operacion
laban sa mga rebeldeng NPA.
Sa entrevista ki Galang, pigtutubodan na si mga sumpak na armas sa
nagka-walo nang incidente nin baradilan sa upper Barangay kan
Calabanga gikan ki Rances. Huli kaini puedeng maresolveran na an
garadanan sa nagkaperang mga barangay digdi na gamit an sinambit
na armas. Sa walong casong garadanan anom na an naresolveran kan
policia.
Na-enot kaini, si Alcalde Evelyn Yu an na-alarma na kan sinambit
na mga caso kaya ngani pig-alerto na an mga miembros kan awtoridad.
Dai man naguntok an policia nganing masusog sagcod na masakyada an
gibohan nin armas.
An duwa sinangatan nang casong illegal possession of firearms o an
pagbalga kan Acta Republica 8294. Sinda parejong detinido na sa
Municipal Jail kan Clabanga Police Station.
Si Alcalde Yu an tolos man nagpalayog nin comendacion sa policia
kan sinambit na banwaan sa tahaw kan sunod-sunod na mga incidente
nin baradilan na an armas iyo an “sumpak”.
Kaibahan ni Galang sa sinambit na operacion iyo sinda: Deputy
Chief of Police Manuel Guisic, SPO2 Everado Intia, Jr., SPO2
Francisco Hernandez, Jr., SPO1 Carlito Capricho, SPO1 Fausto
Samson, Jr., PO3 Rufino Candia, Jr., PO2 Marco Antonio Damasig,
PO2 Reygan Alvarez, PO2 Danilo Encila, PO2 Lauro Cruz asin PO2
Emmanuel Mariscal.
