An anibersaryo iyo an paggirumdom kada taon kan mga nangyari kan inot na panahon na signipicante pa sa presente asin sa mga aldaw na huri.

Ngonian na semana tulong importanteng anibersaryo an samuyang guiniguirumdom:

An anibersaryo kan liwat na pagluwas kan “Bicol Mail” kan Hunyo 18, 2003 pagkatapos isara kan “Martial Law” kan diktador na si Presidente Ferdinand Marcos. Congratulations Publisher Nilo P. Aureus and staff!

An ika-57ng Charter Day kan Naga City. Mabuhay ka Mayor Jesse M. Robredo asin pag-iriba. Siring man sa mga residente kan “Maogmang lugar”!

An kamundagan kan kagsurat kan Ilampog, Ilabay mga 70ng taon na an naka-aging aldaw kan putulan siya nin pusod sa Bgy. Matoogtoog, Mercedes, Camarines Norte. Happy birthday to me!

-o0o-

Hello Garci …!
Sa buhay nin tawo tulo an anibersaryo na higot na tinutungkusan: pagka-mundag (birth anniversary); pag-agom (wedding anniversary); asin pag-kagadan (death anniversary).

Tolong veces sana nakakalaog sa simbahan an ibang Kristiyano: kun binubunyagan, kun ikinakasal, asin kun nagagadan.

Si Nathan Sergio, an civil registrar kan Naga City, tulo sanang veces natao nin serbisyo sa mga ciudadano: pagtao nin certificate of live birth; pag-issue nin marriage certificate; asin pag-pirma sa death certificate.

Alagad, kun minsan, nakakalusot an pagpa-issue maski perang death certificate maski buhay pa o haloy nang gadan an taga barangay na ginigibong sumpay-buhay kan mga pasaway.

Kaya si Sir Nathan nagtao nin warning sa mga kapitan na kun siya magsablay sa pag-issue nin death certificate nin huli sa salang impormasyon kan hepe nin barangay, si kapitan an tatawan niya tolos-tolos nin death certificate!

-o0o-

Hello Garci …!
Tanganing lugod madaling marumdum an anibersaryo nin pagkamundag, magtakod nin mga birthstone sa bulan nin kamundagan.

Birthstone na garnet kun namundag bulan nin Enero; amethyst, Febrero; bloodstone, Marso; diamond, Abril; emerald, Mayo; pearl, Hunyo; ruby, Hulyo; sardonyx, Agosto; sapphire, Setyembre; opal, Oktubre; topaz, Nobyembre; asin turquoise, Disyembre.

Madali an pagrumdom kan anibersaryo nin kasal:

An inot na taon na anibersaryo, Paper Anniversary; 5th, Wooden Anniversary; 10th, Tin Anniversary; 15th, Crystal; 20th, China; 25th, Silver; 50th Golden; 60th asin 70th, Diamond.

Igwa nin mga lalaking pilyo na kun sinda (kono) an masusunod, sa pagpakasal ninda liwat, poon ika-5th anniversary sagcod ika-25th, boot nindang magpakasal sa iba nang babae ta suyado na sinda sa agom na luyos na, makauyam nang kaibahan!

An dai aram kan lalaki, the feeling is mutual. Kun habo na kan lalaki, urog nang habo na an babae. An gusto kan babae bagong kakugos-kugos. Habo na sa dating kataid sa pagturog. Habo na ta gurang na: turog sanang turog, dai na naggigui-os!

An pagrumdon kan anibersaryo kan nagtalikod nang katood, kultura na nin Pinoy. Igwa pa ngani nin turno kun siisay an matipon asin mapakakan sa mga sadiring tawo.

- o0o -

Hello Garci …!
Talagang si GMA igwa nin dakulang problema sa “Gloria Gate”: kun ki isay na boses an kaulay-ulay ni Garci sa tape.

Igwa nin suanoy na rawit-dawit na an sabi.

“Tudi, tudi, ogbos kamote. Kun dai mo matudan, may ati an lubot mo. Kun matudan mo, dai ka nangiwang”.

Si Gloria mayong papadumanan. Kun magsabi na boses niya an yaon sa tape, possible siyang ma-impeach. Kun masabing bako siya, salbado sa kaso an mga pinagsasahutan na nag-wiretapped saiya asin ki Garci!

In the meantime, padagos an pagtios kan mga Pinoy. Soboot, peke an presidente, putikon pa!

HELLO GARCI …!