---

Sa dagdag flete

Trimobile masunod sa jeepney


An Federation of Transport Operators/Drivers Association and Cooperatives (Fetrodaco) sa Ciudad nin Naga an naghagad na sa Sanggunian Panlungsod na buhayon na an saindang peticion sa dagdag na P2.00 na flete sa trimobile asin magtalaan na nin public hearing.

Ini matapos saindang igilid an peticion kan suspendiron kan LTFRB an dagdag na P2.00 na flete sa jeepney, alagag pigpa-implementar na poon kan Martes (Junio 21) kaya mawot naman nindang makisabayan sa paglangkaw kan tarifa.

Si Rafael Duque, manager kan Piston asin namamayo kan Fedrodaco nagsabi na panahon nang maghagad na sinda nin dagdag na flete huli kan padagos man sa paglangkaw an precio kan producto nin petrolio.

An Comittee on Public Utility kan Sanggunian Panlungsod iyo an matalaan kan public hearing tanganing dangogon na an na-pendienteng peticion kan sector nin trimobile.

Dawa na ngani aprovado na kan LTFRB an dagdag na tarifa sa jeepney, alagad digdi sa Ciudad nin Naga asin Camarines Sur dai paman na-implementar huli kan kawaran pa ninda an per metric na kaipuhan iposte sa laog kan jeepney nganing maghagad na nin dugang na flete sa mga pasajeros hali sa dating P5.50 magigi nang P7.50.

Kadakli sa mga chofer an dai muna nag-hahagad kan dagdag na flete huli ta pighahalat man ninda an dugang na flete sa trimobile na sa ngonian P5.00 sana asin tibaad maafectaran man sinda sagcod na magluya an saindang pasajeros.
Huli kan decicion na iyan kan LTFRB, an Kilusan Mayo Uno (KMU) an liwat man naghuhurot sa gobierno na panahon nang actuaran kan Congreso an saindang peticion na P125 na wage increase.

An presenting inaprovaran kan regional wage board na P15 asta P25 na wage increase sa privadong sector bakong maninigo matapos mag-ulanto na an flete na mas lalong pagabat sa pagbuhay kan pobreng trabajadores.