2 gadan, saro erido sa madudugong insidente
GOA, CSur -
Duwang madudugong insidente an nangyari digdi asin sa kataid na
banwaan nin San Jose na nag-resulta sa pagkagadan nin duwang
persona asin grabeng pagkaerido nin saro pa kan nakaaging Domingo.
Saro sa manga nagadan iyo si Justiniano Buendia, Jr. 3 anyos na
soltero asin residente kan Del Carmen, Lagonoy, Camarines Sur.
Susog sa report ni Mariano San Diego, barangay captain kan baryo
Mabini, banwaan nin Goa, si Buendia binadil nin dai nabistong
lalaki mantang nakikipag-inoman sa residencia ni Bgy. Kagawad
Robert Balona sa nasambit na lugar bandang alas 8:00 so
pagka-banggi kan nakaaging Domingo.
An caso pinagsisiyasat pa kan policia nin Goa katabang an manga
militar na iyo an nagmamato sa manga barangay na nasa abaga kan
Isarog Mountain bilang saindang area of responsibility.
Sa banwaan nin San Jose, si Adiangao Bgy. Captain Heriberto
Alarcon nagreport man sa policia na duwang residente kan saiyang
barangay an naputokan nin bomba mientras na ilegal na
nagdadakop-sira sa kadagatan kan barangay Lagha, Presentacion,
Camarines Sur.
Segun saiya, an insidente nagresulta sa biglang pagka-gadan kan
sarong binisto niyang si Salvador Panagan asin grabeng pagka-erido
ni Roel Fernandez na yaon ngonian nagpapa-omay sa Bicol Medical
Center.
Dai man sinabi sa report kung ano an sangkap kan bomba, o dinamita
na ginamit sa paghaman kan nasambit na paputok.
An kadagatan kan Lagonoy Gulf iyo an paboritong lugar kan manga
parabomba nin sira asin iba pang klase nin illegal fishing. (Ed
Salvo)
