BID malapag na kan mga ilegal na dayuhan
AN
oficina central kan Bureau of Immigration and Deportation (BID)
mapadara nin personajes digdi sa Bicol nganing magtabang sa
district office kaini sa Ciudad nin Naga sa pag-verificar kun pera
na an nakalaog na mga Indian national, Vietnamese, Taiwanese asin
maging iba pang dayuhan nganing maaraman kun igwa nang mga
overstaying asin ilegal na nakalaog digdi sa region cienco.
TRIA
Si Atty. Jose Tria, Jr. regional alien control officer kan BID
District Office nagsabi sa Bicol Mail na inaprovaran na an saiyang
kahurotan sa saindang main office nganing maverificar an mga
documentos kan mga dayuhan na nakalaog sa Kabikolan mientras na
igwa nganing mga tourist visa sana, alagad naging nang
permanenting residente sa Bicol.
An sinambit na agencia ma-up date kan gabos na lista kan visa kan
mga dayuhan huli ta digdi sa Ciudad nin Naga asin Camarines Sur
igwa sanang registradong 25ng mga Bombay alagad kun a mga
naglalaog sa simbahan kaini na iyo an Bicol Indian Sikh Temple,
Inc. masobra pa sa 50 an mga nagraralaog.
An report kan district office kan BID igwa nang 78ng mga Taiwanese
sa laog sana kan Ciudad nin Naga afuera kan mga Vietnamese.
Si may mga completong documentos asin maging si mayo sa saindang
record an kaipuhan mag report sa district office nganing
i-deportar na si mga overstaying orog na si mga ilegal na nakalaog
sa Kabikolan.
Kan Noviembre 2, 2005 an BID operative na si Immigration Agent
Simeon Elevia pig-arestar si Indervit Singh, 33 anyos kan
Concepcion Pequeña, Ciudad nin Naga huli kan kawaran nin
documentos asin overstaying na Indian national.
Si Singh, pigdakop sa laog kan Indian Temple sa Brgy. Balatas kan
Noviembre 2 susog sa orden kan BID central office na tolos man
pigdara sa Manila nganing ideportar na sa saindang nacion.
An BID district office na kulang an personajes naglalaom sa
pag-abot kan saindang dagdag na mga Immigration Agent igwa pang
mga madadakop na mga ilegal na dayuhan bako lang digdi sa
Camarines Sur envez sa iba pang provincias kan Kabikolan.
Mientras tanto, pigcoconsiderar ni Tria na puedeng may
nangyayaring human smuggling sa region huli ta dai ini maibitaran
igwang dakul na kadagatan an malulusotan kaya ngani maconducir na
sinda nin pagverificar kan mga record kan mga alien.
