---

Decicion kan SB pig-apelo ni

Vocal Briones sa junta

PILI, Camarines Sur - Si Barangay Capt. Domingo U. Briones kan Tambo, Pamplona, Camarines Sur asin ex-officio member kan Liga ng Barangay sa Sangguniang Panlalawigan nagplantiar na nin peticion na saiyang pig-apelo an decicion kan Sanggunian Bayan (SB) kan Pamplona, Camarines Sur sa penalidad na perpetual disqualification sa pagkapot nin puesto sa gobierno huli sa casong dishonesty and immorality.

Ini an confirmacion ni Vocal Angel Naval kan segundo distrito kan Camarines Sur asin an apelo yaon na sa comite kan junta provincial na nagkakapot kan mga caso administrativo si Vocal Ariel Oriño.

Plano nang iimplementar ni Alcalde Gemino Imperial kan Pamplona, Camarines Sur an pagpatanggal bilang Brgy. Capitan kun dai nakasumiter kan sinambit na peticion si Briones.

Pigcuestion ni Briones an decicion huli ta nagka-igwa na nin forum shopping asin an isyu sa lack of jurisdiction. Sagcod na pendiente an apelo kan caso magpapadagos pa siya bilang Brgy. Capitan asin ex-officio member sa junta provincial kan Camarines Sur.

Sinabi ni Briones sa prensa na haloy na sindang nagsasaro ni Patricia Abrian asin saiya nang esposa huli ta haloy na sindang suhay sa enot na agom aram na kan publico an saindang pag-ibahan bilang sarong familia mayo naman digdi nin immorality.

Ginamit kan nagreclamo na evidencia iyo an pagplantiar nin certifico de candidatura ni Briones sa Comelec komo candidatong barangay capitan kan eleccion kan 1997 na an pigbugtak na legal na esposa iyo si Abrian.

Si Dulcena A. Ludovico iyo an nagsangat kan caso kan Junio 1, 2004. Pigbuyagyag ni Briones na igwang motivo political an nagreclamo asin igwa sindang dismentihan sa daga.

An saiyang kasaroan mala ngani nagcandidato pang consejal kan eleccion kan 2004 na aram kan publico na sinda iyo na an nag-iibahan huli ta suhay naman sinda sa enot na esposa kaya sa pagtubdo niya harayo naman digdi an isyu sa immorality kaya ngani saiya giraray na pig-apelo an decicion kan mayoriang miembros kan SB Pamplona na firmado man ni alcalde Imperial.

Matapos an decision kan SB si Briones na kaalyado ni Congresista Nonoy Andaya sa Liberal Party (LP) nagsumpa na sa Lakas-CMD ki Governador L-Ray Villafuerte.