P5.2-B Hinagad na sa
Congreso
Duque nagpangako nin dagdag
benificios sa mga health worker
AN
Department of Health (DOH) an naghahagad nin dugang na prosupuesto
sa Congreso nin P5.2 billiones para sa budget sa 2006 sa
presenting budget na P9.5 billiones nganing magka-igwa na nin wage
increase asin iba pang mga benificio an mga health workers sa mga
hospital kan gobierno na naghahali na sa Filipinas nganing
magtrabajo sa abroad huli ta sobra pa sa 100 por ciento kalangkaw
an pig-oopresir na sueldo kun icocomparar digdi sa nacion.
Dakul nang mga hospital kan gobierno kabali na an Bicol Medical
Center sa Ciudad nin Naga kulang na an mga doctor asin nurses
matapos sainda nang bayaan huli sa hababang sueldo sa gobierno
envez magtrabajo na sa luwas kan nacion mientras na halangkaw an
pig-opresir sa sainda.
Sa press conference kan Martes (Noviembre 8) ni DOH Secretary
Francisco Duque III na ginibo sa Villa Caceres Hotel inako niya na
mas dakul an mga doctor an gustong magtrabajo na sa abroad sagcod
na magclase nin nursing ngani sanang makatrabajo sa mga hospital
sa ibang nacion.
An pighahagad kan DOH nin dagdag na P5.2 billiones yaon na sa
deliveracion sa Congreso para sa 2006 national budget, alagad an
saiyang propuestong solucion sa problema iyo an posibleng pag-subsidize
kan matricula sa mga deserving student. Magkaka-igwa nin contrata
na sa cada taon sa pagtabang sa matricula babayadan sa paagi nin
duwang taon na community service na puedeng madestino sa mga
Municipal Health Office asin hospital.
An ika-duwang solucion segun ki Duque sa isyu kan compensacion na
iyo an saindang katuyohan sa dagdag na prosupuesto iyo an dagdag
na mga bunos, hazard fee, longivity fee, asin overtime fee . An
mga benificios na ini dai nakokoa kan mga doctor huli kan mayo nin
base legal. Ini papaagihon na sa legislacion tanganing makaayon sa
prosupuesto sa 2006.
An Philippine Medical Association (PMA) an na-aalarma na kan
padagos na pagluwas sa nacion kan mga doctor asin nurses afectado
na an mga hospital asin an programa kan salud. Si Dr. Jose “Sonny”
Rañola, presidente kan PMA sa Camarines Sur nagsabi na an saindang
organisacion nacional an nagpasar na nin resolucion na nag-hahagad
sa gobierno na resolveran na an pagkulang-kulang nin mga doctor sa
nacion sagcod na pighagad na dapat dugangan an sueldo asin iba
pang mga benificios kan health workers.
Dai palang nahahaloy an Alliance of Health Workers an nangapodan
na sa gobierno sa problema sa pagharali kan mga doctor mala ngani
igwa nang ibang district hospital na mayo na nin doctor.
Saindang pighurot sa Appropriation Committee sa Congreso na
actuaran na an pighahagad na dagdag na mga benificios mala ngani
igwang mga hospital na nagseserve nin 24 oras an doctor kulang pa
an narerecibing mga benificios.
Igwang nagrerecibing P25,000 na mga Municipal Health doctor alagad
kun guguntingan pa ini nin mga deduction cada bulan an saindang
take home pay mga P10 asta P15 mil.
An BMC asin an Bicol Regional Training and Teaching Hospital saro
sa dakulang hospital kan gobierno sa Bicol bilang na sana sa muro
an mga nawalat na doctor kaya ngani an mga paciente dai nang gayo
na-aasekaso kan hospital.
