---

Filariasis lakop na sa Filipinas

AN FILARIASIS na daing gayo pigtatawan nin prioridad kan gobierno an campania contra sa helang na ini kan mga nakaaging panahon iyo na an ika-duwang helang na causa kan permanent disability.





CAMPANIA VS FILARIASIS. Si DOH Sec. Francisco Duque, III (nasa wala) pina-inum nin bulong nin pangontra sa filariasis sinda bise gobernador Salvio Fortuno (nasa tahaw) PHO Officer Dr. Alejo Aralar (sa too) asin si Alcalde Gil Basmayor (mayo sa retrato) kan Minalabac, CSur sa ginibong ceremonial mass drug administration sa Villa Caceres Hotel sa Ciudad nin Naga. Kataid ni Duque si Jean Mare Olive representante kan World Health Organization.

Nagsakat na sa 25 milliones an afectado kan Lymphatic filariasis sa 82 milliones na populacion sa Filipinas asin an 600,000 an yaon na sa listahan kan permanent disability.

An filariasis sarong helang na nakokoa sa kagat nin namok na nag-eestar sa abaca plantation, kabatagan maging sa tinanum na natong.

Si DOH Secretary Francisco Duque naglilibot sa nagkapera nang region sa campania na ma-preventar an pagdakul kan numero kan sinambit na helang asin kan nakaaging Martes nagvisita sa Ciudad nin Naga sa paglansar kan filariasis mass drug administration kick-off program na ginibo sa Villa Caceres Hotel.

Sinabi kaini na si Presidente Gloria Macapagal-Arroyo nagpaluwas nin Executive Order 369 kan taon 2004 na nagdedeclara na an bulan nin Noviembre cada taon iyo an paglansar nin mga pagbulong contra sa Filariasis.

An anom na provincias kan Kabikolan an afectado na kan helang na ini kaya ngani kabali sa pigvisita ni Duque sa pagpakusog kan campania laban sa Filariasis.

An report kan DOH nagpapahayag na 76 por ciento kan establisadong lugar na mga 4th asin 6th class municipalities asin 39ng mga provincias an nasa inaapod nang “endemic”.

Kan taon 1995 an pigdeclara sa World Health Assembly na an filariasis saro sa anom na mga helang na dai na mabubulong sagcod na pig-prioridad na kan 1997 asin naghiro na an World Health Organization kan 1998.

Digdi sa Filipinas kan taon 2000 nag-efecto naman an Filariasis Control to Filariasis Elimination ini sa paagi kan ginigibong Mass Drug Administration.

Kan 2001 iyo an pagsikad kan Mass Drug Administration sa mga pilot areas sagcod na nag-isyu si GMA kan EO 369 kan taon 2004.

Sa ginibong programa sa Villa Caceres si bise gobernador Salvo Fortuno iyo an nagrepresentar ki Gobernador L-Ray Villafuerte, si Alcalde Gil Basmayor kan Minalabac iyo man an nagrepresentar kan LMP Camarines Sur Chapter.