Mga Bombay na envuelto
sa 5-6 ipapaapod kan SP
YAON na sa
Committee on Ways and Means kan Sanggunian Panlungsod kan Ciudad
nin Naga an pag-adal sa pag-imponer na nin buis sa mga Bombay na
nagpapa-utang nin “5-6” mientras na sakop an sinambit na negocio
susog sa provision kan National Internal Revenue Code.
An comite na pinamamayohan ni Consejal Salvador del Castillo
matalaan nin committee hearing sa consejo nganing invitaran mismo
an mga Indian national na envuelto sa “5-6” operation sa ciudad
maging arin paman na rasa, alagad an Bureau of Immigration and
Deportation (BID) kabali sa iinvitaran nganing magdeterminaran kan
status kan visa kan mga dayuhan na envuelto sa sinambit na negocio.
Si Naga Revenue District Officer Socorro La Fuente enot nang
nagpahayag na dapat i-regulate kan LGU an operacion kan 5-6 huli
ta kaipuhan singilon sinda nin buis ta tinutogot man ini sa codego
kan internal revenue.
Yaon sa listahan na iinvitaran sa pagtalaan nin committee hearing
iyo an mga representante kan Bureau of Internal Revenue,
Department of Trade and Industry, BID asin an mga envuelto sa
negocio kan 5-6, sabi pa ni del Castillo.
An annual report kan BID kan taon 2004, 25ng mga Indian national
registrado bilang mga tourist visa alagad na-renew sana kan
saindang documentos cada taon defende sa saindang papeles.
Si Atty. Jose Tria, Jr. Regional Alien Control Officer kan BID
district officer sa Ciudad nin Naga nagsabi na sa ngaran na
pag-imponer nin buis yaon na iyan sa LGU asin sa BIR huli ta an
sainda sanang trabajo iyo an pag-aram kan mga documentos kun legal
o ilegal an mga dayuhan sa laog kan provincia.
Ipinahayag ni Del Castillo na dakul nang mga millionariong Bombay
sa Naga an haloy nakalibre sa pagbayad nin buis asin kun ma-aprovaran
puedeng singilon sinda sa business tax sagcod na magparegistro sa
DTI na obligado nang mag-isyu nin mga oficial na recibo sa
saindang transaccion sa pagpa-utang nin cuarta.
