AN pang-gagadan sa sarong intelligence operative kan Naga City PNP SPO3 Casiano “Sonny” Parumog sa Ciudad nin Naga kan Noviembre 30, 2005 an naresolveran na, si NBI Regional Director Ricardo Diaz nag-anunciar na kasuodma sa ginibong NBI PNP Task Force Unsolved Killing Breakfast Dialogue sa mga miembros kan media.
Photo Caption: NPA NA NAGBADIL GADAN KI SPO3 PARUMOG PIGBUYAGYAG NA - Sa retrato pinapaheling ni Chief of Police Roger Medalla (sa wala) an suspechadong si Antonio Suarez y Camu, mientras na nagpapaliwanag ni NBI Director Ricardo Diaz (sa to-o) sa miembros kan media an resulta kan investigacion kan task force.
Si Diaz nagpahayag na an suspechado miembro an NPA sparrow unit pigbistong si Antonio Suarez y Camu, taga Daraga, Albay asin nag-eerok sa Barangay Cambalidio, Libmanan, Camarines Sur.
An NBI-PNP task force nagrecomendar na sa City Prosecution Office ki Suarez asin saro pang John Doe na sangatan nin casong murder susog sa articulo 248 kan revised penal code.
An Naga City Peace and Order Council sa paagi kan iniciativo ni Director Diaz nagcrear kan sinambit na task force nganing resolveran an mga napabayaan na casong murder dai pa natapos an saiyang plasong tulong bulan enot nang naresolveran an paglikidar ki Parumog asin igwa pang mga masunod pigcocompleto nalang an mga evidencia asin cooperacion kan testigos.
Si P/Inspector Roger Medalla, jefe de policia kan Ciudad nin Naga nagsabi na sa ginibong police picture line-up na pig-presentar kan task force sa testigong si Antonio Despabiladeras y Abias, para-tienda nin ice cream positivong na-identificar an suspechado.
An testigo nagpahayag na mga alas 7:45ng aga kan Noviembre 30, 2005 si Suarez saiyang nabisto huli ta yaon sa saiyang likodan mientras na nakatindog man siya sa ice cream car. An suspechado sibot sa pag-gamit kan saiyang cellphone.
An testigo naka-posicion sa atubangan kan sari-sari store ni Daniel Briones pakatapos nin mga 15 minutos si Suarez mga siete metros an distancia sa may canto kan Doña Clara Village, Concepcion Pequeña, Ciudad nin Naga sa atubangan kan Meliton Elementary School nabigla siya kan magbunot sagcod na pigkasa an badil mantang nagdadangadang an motorsiklo na pigmamanijo kan victima pasiring sa Central Business District II kan maka-abot sa kanto kan tinampo binadil nin duwang veces kan calibre 45ng pistola sagcod na natumba kasabay an motorsiklo.
Sinipa pa sa payo, kinoa si service na badil asin cellphone kan victima. Saro pang John Doe an nagrani binadil pa sa lalawgon. An duwa nagdulag parising sa Doña Clara Subdivision.
Sa report kan task force sinabi pa na pakatapos nin tulong aldaw kan likidaron an victima sarong surat hali ki Ramona Caceres kan NPA sa Camarines Sur an pigpadara sa familia kan victima na nag-aako na sinda an responsable sa crimen.
An mga miembros kan task force nagtarabangan nganing maresolveran an sinambit na caso kinababalihan ninda NBI Sr. Agent Edwin Marpuri asin special investigator Aaron Dolong, kan oficina regional kan NBI Bicol. Sa lado kan polis sinda; Sr. Inspector Joventino Rosales, SPO3 Rodolfo Luis Gonzaga, SPO3 Teodorico Presentacion, PO3 Danilo Agawa asin P03 Ruderich Carino, sinda pig-aapod na magnificent 7.
