AN Department of Environment and Natural Resources (DENR) sa laog nin tulong taon nag-aambicion na maging marambong nin kakahuyan an mga gilid kan highway sa paagi kan ilalansar na nationwide tree planting project na inaapod “Green Philippine Highway” na sarabay na gigibohon sa Agosto 25, 2006 poon sa Aparri sagcod digdi sa Kabikolan.

        An cada LGU na aagihan kan proyecto maproducir nin 2,000 katawo nganing magparticipar sa taranuman nin narra asin mahogany tree. Igwang memorandum of agreement an LGU asin DENR sa pag-ataman kan mga tinanum na kahoy nganing bakong sagcod sana sa sarong aldaw na pagtanum.

        Papanginotan ni DENR Secretary Angelo Reyes an tree planting na may pangiturogan sa saiyang liderato mailaag sa Guinnes Book of World Records an pinakahalabang taranuman nin kahoy.

        Alagad antes kan sarabay na tree planting sa Agosto 25, 2006 alas 10:00 nin aga, si Reyes an ma-digdi sa Camarines Sur sa Agosto 21, 2006 para sa formal na ceremonia na gigibohon sa Capitol Convention Center na aatendiran kan mga oficiales local, manlaen-laen na sectores asin kan mga taga DENR.

        Si Consejal Ronaldo “Boy” Franco, chairman kan committee on environment kan Sanggunian Bayan kan Pamplona, Camarines Sur nagpahayag na an mga taga DENR nakipag-conferencia na sa saiya sa oficina ni Alcalde Geminio Imperial nganing magtarabangan sinda sa proyecto.

        Sa sinambit sanang sadit na banwaan kaipuhan an 2,000 na personas nganing maging envuelto sa nationwide tree planting.

        Pigdududahan kan ibang oficial kan DENR sa Camarines Sur na an proyecto ni Reyes may katuyohan pam-politica huli ta macandidatong senador sa eleccion sa taon 2007. Afuera pa kaini, nagpa-imprentang mga t-shirt na may pangaran niya asin retrato pati na an mga streamers na papalakopon sa pang nacion na taranuman nin kahoy. An gastos sa imprenta hali sa fondo kan DENR.

        An DENR igwa nang mga ginibong coordinacion sa mga LGU na aagihan kan tree planting na pag-exactong alas 10:00 nin aga an pighagadan nin suportang mga civic club, escuelahan, oficiales local kaipuhan andam na an saindang mga tao sa tree planting.

        Igwang memorandum of agreement an LGU asin DENR na dapat sunodon nganing sa laog nin tulong taon kun nabuhay asin nagtalubo na an narra asin mahogany tree dapat i-turn over sa nagtanum na saiya man ipapangaran.

        An DENR iyo an matao nin technical assistance asin kan mga itatanum na kahoy, ma-issue kan certificate of stewardship asin ma-monitor asin evaluar kan proyecto.

        An LGU iyo an matao kan project site kan tree planting, mamantenir, maprotihir asin maataman nganing maseguro na matalubo sagcod iyo an makalap nin mga tao na matanum.