Si Col. Florante Isles, oficial na parapahayag kan 9th ID digdi sa Bicol na may base sa Camp Elias Angeles, Brgy. San Jose, Pili, Camarines Sur nagpahayag kaini sa miembros kan prensa kasunod kan pagkaka-gadan sa encuentro kan 42ng Infantry Battalion ki Julious Capin alias ka Freddie sarong NPA Commander sa Pasacao, Camarines Sur (sakop kan premirong distrito) asin pagkakadakop ki Ka Asis asin mga pag-iriba ISLES kaini. An mga nagkadarakop sinda, Dante Sotto Tadeo alias Geo, Cristina Compedente Labra alias Jane, Nancy Gacer Zamora alias Vicky asin Christopher Cañeso Cabarles, alias Totoy/Bunso matapos kan nangyaring encuentro sa Buhi, Camarines Sur kan cuarto distrito.
An pagkakagadan kan saindang lider asin pagkakadakop pa kan mga namamayo kan CPP/NPA sa cuarto distrito na-ngangahulugan na “neutralized” na an rebeldeng movimiento sa sinambit na distrito, sabi pa ni Isles.
Nangenotan sa encuentro laban sa NPA sa Pasacao, CSur kan Julio 6, 2006 iyo si Lt. Laurente Meriales (INF) asin sa Buhi, CSur kan Agosto 7, si 2Lt. Nelton Pacuan (INF) gabos kan 42nd Infantry Battalion.
Sa sinambit na mga encuentro nakasamsam sinda nin mga armas siring kan M-16 armalite, calibre 38, 45ng pistola, granada asin iba pang mga armas na pigpresentar ki Major General Alexander Yaon, SOLCOM Commander kan ini magvisita kan nakaaging semana sa campo kan 9th ID.
Si Brig. Gen. Napoleon Malana, Commanding General kan 9th ID nagsabi na an cooperacion kan mga civilian asin mga oficiales de barangay dakulang tabang sa campania laban sa insurgencia.
Matapos kan mga encuentro kan militar sa premir asin cuarto distrito kan Camarines Sur na nagkapera an mga binawian nin buhay sa ngonian nawara na an mga piglalansar na ofensiva kan mga rebeldeng NPA.
Dinagdag pa ni Isles na digdi sa rehiyon cienco poon kan Enero asta sa ngonian na bulan may 40 nang mga civilian Cafgu asin kabali na an gikan sa PNP asin militar na piglikidar kan mga NPA.
Mientras tanto, si Major Gen. Yano nagsabi na puedeng marealisar an campania na mapuho an kumunistang movimiento sa nacion kun igwang cooperacion sa mga oficiales local, comunidad asin kan mga politico.
An reclamo ngonian sa establismiento militar iyo an mga acusacion kan militanteng grupo na sinda man sana an nasa likod kan mga extra judicial killing alagad pigtutukdo man kan mga oficial kan PA na mga dati man sanang kaibahan kan mga nag-aacusar.
Si Presidente Gloria Macapagal-Arroyo nagcrear na kan Melo Commission nganing iyo an mag-investigar kan mga political killing. Ini natutuyawan kan oposicion huli ta pigbilog nganing idefensa an administracion.
