BINASURA kan City Hall an ambicion kan Landco Pacific Corporation na mabugtak sinda nin mall na cantidad P1 billiones an proyecto alagad kaipuhan tawan sinda nin pitong taon na moratorium na dai magpalaog nin arin man na dakulang developer nin mga mall nganing dai sinda magka-igwa nin dakulang competencia asin maibitiran an dakulang pagkakalugi.
Sinabi ninda bise alcalde Gabriel H. Bordado, Jr. asin Consejal John Bongat nagbabalga sa economic provision kan constitution mapadapit sa free enterprises asin makakasapog sa alanganin an mga oficiales local sagcod na hahagopon nin caso sa graft and corrupt practices act.
Sa special meeting kasuodma kan mga miembros kan Sanggunian Panglunsod na presente si alcalde Jesse M. Robredo, si Alfred Xeres-Burgos presidente kan Landco pigpresentar na an proyecto na mamumugtak sa limang hectariang lote sa Almeda Highway asin naghagad nin suporta kan local na gobierno kan Ciudad nin Naga sa paagi kan tulong mga minasunod; 1. magka-igwa nin traffic re-routing plan, 2. tawan sinda nin fiscal incentives sa business asin property tax asin 3. an pitong taon na moratorium na dai na magtugot na magbugtak nin dakulang developer kaparejo kan saindang negocio.
Mayo na nin debate sa premiro asin ika-duwang kahagadan alagad sa ika-tulo an dai nag-uuyon an mga oficiales local mientras na dai man sinda nag-uulang sa paglaog kan mga darakulang investor.
Pigpaliwanag kan Landco Pacific na naghahagad sinda kan sinambit na moratorium huli ta habo na ninda mangyari si efecto sa Ciudad nin Lucena na nagbugtak sinda nin mall nagkarulugi huli ta tinugotan pa kan LGU na maglaog an iba pang mga darakulang developer na nagpaconstruir kan kaparejong negocio. Pinangenotan ni Bongat kun ta’no ta dai nagpapabor an City hall sa pighahagad na moratorium huli ta dai dapat maki-aram an gobierno kun mabugtak o dai an sarong negociantes.
Pighalimbawa kan consejal na dai pueding bawalan kun magbugtak nin MacDonald sa tungod kan Jolibee, malalaag sa alanganin an Sanggunian Panlungsod.
Mientras tanto, na enot naman kaini si Robredo an naghaman nin mga programa sa pagpakarhay kan central business district I sa paagi kan mga proyecto sa infrastructure, re-routing kan trafico asin nagkapera nang plano huli ta dai mahahaloy na mga panahon magraralaog an mga darakulang mall na ngonian nangyayari na ngani.
Pigtatawan man giraray nin proteccion kan City Hall an mga orihinal na negociantes kan ciudad sa CBD I dawa na ngani nagdadakul an numero kan pagbugtak nin mga mall sa CBD II, sabi man ni Bordado.
