Sobra sa 1.9B an pinakahuring natipon na report kan Provincial asin City Disaster Coordinating Council sa danyos sa infrastactura asin agricultura sa Camarines Sur asin Ciudad nin Naga matapos ka n super typhoon “Reming” sa Bicol.

        An Provincial Disaster Coordinating Council (PDCC) kan provincia igwa nang record na 64ng mga nagadan, 172 na iredo mientras na sa City Disaster Coordinating Council kan ciudad 15ng iredo asin mayong gadan.

        Sagcod kasuodma an record kan PDCC igwa nang total na P1.1-B asin sa CDCC nag- abot na sa P807,301,316 si mga danyos sa infrastractura asin agricultura.

        Padagos pa an mga relief operation sa mga afectadong familia kan nakaaging calamidad, an PDCC sa pamamayo ni Gobernador L-Ray Villafuerte nakakarecibe nin mga ayuda hale sa gobierno nacional huli ta kaalyado siya kan administracion. An CDCC sa pamamayo ni alcalde Jessie M. Robredo, igwa naman nakokoang mga ayuda sa ibang mga agencias kabali na sa privadong grupo mientras na mayo pa nin ayuda hale sa gobierno nacional ta bako siyang kaalyado sa politica ni GMA.

        Kasuodma nag-abot an may 250ng mga truck na kargado nin mga relief goods hali sa gobierno nacional na pinangenotan ni DBM Sec. Rolando Andaya Jr. an pag-turn over sa PDCC.

        Sinabi ni Andaya na an 125ng mga truck an dadarahon sa provincia kan Albay na dakula si destruso kan nakaaging calamidad.

        An Task Force Reming Naga, an pig-crear ni Robredo susog sa Executive Order No. 2006-017 padagos na nakakatipon nin mga ayuda hali sa manlaen-laen na sektores sagcod na saindang target an P10-M nganing matapos an saindang rehabilitacion asin pag-tabang sa mga familia na nagkagarabaan nin harong.

        Igwang 2,980ng mga pinalakmang kaharongan asin 5,775ng mga partial damaged na mga harong sa 27ng barangay kan Naga.

        Sinabi kan chairman kan CDCC na masurat sinda sa mga sister city nganing maghagad nin donacion para itabang sa victima kan calamidad asin ini pueding makahipno sa mga panganga-ipo kan mga nadestroso kan bagyo.

        An task force Reming Naga, pinamamayohan ni Fr. Nelson Tria asin an mga miembros hali sa sector nin negociantes, media, ladies in green, DTI asin iba pang privadong grupo.

        Nag-miting sinda kan Martes na kun haen an saindang mision iyo an pagpadagos na paghanap nin ayuda nganing makatabang sa mga victima kan nakaaging calamidad.