An naghihibog nang numero nin mga registrants na componido nin bagong votantes, trabajadores maging nagbalyong presento hali sa ibang lugar, an nagpipirila na sa oficina kan Commission on Election sa Ciudad nin Naga asin sa iba pang banwaan kan Camarines Sur nganing magpa-registro para sa masunod na eleccion murong taon.
Photo Caption: REGISTRACION NIN MANGA VOTANTES SA COMELEC. Limang aldaw antes kan ultimo dia sa Deciembre 31, 2006 nagparahibog na an nagpipirila sa Comelec Naga. Kulang an empleados sinabayan pa kan naghahabol sa oras na mga maparegistro.
An rehiyon Bicol nirapado nin bagyong “Milenyo” asin “Reming” huli kaini sobra sa sarong semana dai nag-aaceptar an mga oficina kan Comelec nin mga registrants mientras na dai nagfufuncionar an mga computer machine huli kan kawaran nin corriente.
Dakul na mga mapa-registro an na-cancelar an saindang pigtalaan na pagpalista sa mga oficina kan Comelec.
Si Atty. Maico Julia, Jr. Election Officer kan Ciudad nin Naga kan macondunciran nin entrevista kan Bicol Mail nagpahayag na an Comelec nagpako kan ultimo dia para sa registracion sagcod sa Deciembre 31, 2006 asin dai na e-extendier mientras na susog sa Acta Republica 8189 nagsasabi na mayo nang registracion an icoconducir sa periodo sa pagsikad kan 120 dias antes kan regular election asin 90 dias antes kan special election.
Kan Deciembre 26, 2006 kabali sa pigdeclara kan Malacañang na special holiday alagad ini hinali kan Comelec envez bukas an saindang mga oficina kabali an Deciembre 30 (Rizal Day). Pigconfirmar ni EO Julia na nagpaluwas nin resolucion an Comelec Manila na magtrabajo an mga personajes dawa panahon nin mga fiesta oficial.
Bako nalang an mga ciudades an tinugotan kan Comelec na magbukas asin mag-ako nin mga registrants sa aldaw nin Domingo envez kabali na an mga municipio, sabi pa kan Election Officer kan Naga.
Nareresa kan oficina kan Nareresa kan oficina kan Comelec na entusiasmado an mga votantes na magparticipar sa May 2007 election kaya ngani dawa natatapos palang an duwang supertyphoon sa Bicol nagpipirila an mga registrants nganing makaseguro na maka-voto sa eleccion.
Igwa nang dugang na 4,500 na nagpalista asin ini piglalaoman na malangkaw asta sa pigtalaan na plaso kan Comelec.
Kan eleccion kan May 2004 an ciudad nin Naga may total na 66,174ng votantes asin an naka-voto digdi nag-abot sa 53,078 na igwang 80 por ciento si turnout kan sinambit na eleccion.
