MAABOT sa 116 na mga tore kan National Transmission Corporation (Transco) an pinalakma ni bagyong “Reming”, preparado na mag-supply nin 100 megawatts sa mga electric cooperative (EC) sa rehiyon cienco, alagad dai masasabay an gabos na mga EC, an enot nang pinabulosan nin corriente kasuodma iyo an may 60 por ciento pa sana kan centro kan Ciudad nin Naga.
Photo Caption: PINATUMBANG TORE KAN TRANSCO. Nakoa-nan nin retrato kan personajes kan National Transmission Corporation mientras na nasa helicopter na pig-lalagadi an natumbang tore sa Minalabac, Camarines Sur kan parahabon nin batbat. Saro pa ini sa causa kan pagka-abala kan pagsulit kan mga linea kan Transco sa Bicol.
Dakul an pinatumbang mga poste kan Camarines Sur II Electric Cooperative (Casureco II) sa Naga maging an mga linea nin telepono. Sa maabot na pagsabat nin pasko asin bagong taon dai pa macocompleto an servicio nin corriente asin telepono.
An Naga-Tinambac - pigtalaan sa Deciembre 9; Naga Pili-Iriga sa Deciembre 16; Pili-Lagonoy sa Deciembre 20 asin an pinakahuri iyo an Libmanan, sakop kan Casureco I sa maabot pang Deciembre 21, 2006.
Sa Daraga-Legaspi sa maabot na Deciembre 16; Daraga-IPPC sa Deciembre 16; Daraga-Sorsogon-Irosin sa Deciembre 16; asin sa Pili-Lagonoy sa Deciembre 21.
Sa ginibong miting kan mga general manager asin presidente kan junta directiva kan mga ECs sa Bicol na pinaapod ni Vice President for Operation Guillermo Redoblado kan Transco kan Lunes, an Transco dawa pirilay an saindang tore andam mag-supply nin corriente gikan sa Luzon grid sa Tayabas, Quezon.
An mga general manager na hali sa Camarines Sur, Albay asin Sorsogon nagsabi na nagpapadagos pa an saindang rehabilitacion huli kan dakulang destroso sagcod na aaboton pa nin Enero 2007 nganing totalmenteng ma-isulit an gabos na mga linea palaog sa mga hararayong barangay.
Matapos kan enot na bagyong “Milenyo” an mga ECs sa Kabikolan nagkoa nin supply nin corriente sa Tiwi Geothermal Plant sa Albay, pundo an operacion dai makafuncionar sa laog nin perang mga bulan huli ta 75% kan planta na-afectaran kan nakaaging calamidad.
Si OIC GM Engr. Rodel Pasumbal kan Casureco II nagsabi na pakatapos kan saindang pagpabangon kan backbone line isusunod ninda sa mga barangay asin sa iba pang mga banwaan na sakop kan saindang coverage area.
Nag-abot sa 116 na tore kan Transco an liwat pinabagsak kan nakaaging calamidad asin 887ng mga poste nasa mga sub-transmission line asin nasa P1 Billion si naging destroso.
Sagcod sa taon 2008 matatapos an pagpaconstruir kan mga nadestrosong tore.
Bako lang calamidad an dakulang destroso sa Transco envez maging an mga pasaway na parahabon kan batbat kan mga natumbang tore mala ngani nakoa-nan pang retrato an naglalaging persona kan mga mamahalon na batbat kan tore.
Sa kaparejong miting kan oficial kan Transco sa mga general manager sinda tatawan nin pagpalawig nin pagbayad kan power bill na envez na 30 dias gigibohon nang 45 dias huli kan nakaaging calamidad sa Bicol.
Nasitar sa tiripon iyo si General Manager Peter Prestado kan Camarines Sur III Electric Cooperative huli kan dai na-susunod si kasundoan sa restructuring kan saindang milliones pesos na morosidad sa Transco.
