Boncodin pigsikwal na ni Alfelor
Ciudad nin Iriga – Dawa mayo nin consultacion sa mga oficiales
local asin sectores kan Buhi, Camarines Sur si Congresista Felix
Alfelor, Jr. kan cuarto distrito kan Camarines Sur nagdecicion na
ribayan nin pangaran an Boncodin Highway sa ngaran kan saiyang
dipuntong ama na Gobernador Felix Alfelor, Sr.
An Boncodin Highway iyo an pigpapadagos pang proyecto na haling
Buhi pasiring sa Malinao, Albay.
Igwa nang enot na pangaran na pigrecomendar an Sanggunian Bayan
kan Buhi, alagad dai man pig-dangod ni Alfelor huli ta magcontra
partido sinda ni Alcalde Diones Belza, envez can yaon pa sa puesto
si Emilia Boncodin bilang Secretary kan Department of Budget and
Management (DBM) iyo an pigpadangat kan congresista huli ta
makakatabang pa sa pagluwas nin fondo kan sinambit na proyecto.
Alagad sa ngonian naging padatulan na ribayan an pangaran na
Boncodin Highway huli ta pigkoa sa pangaran kan ama kan dating DBM
Secretary na dai man naging oficial kan gobierno.
Si Emilia Boncodin, kabali sa miembros kan inaapod na “Hyatt 10”
na mga miembros kan gabinete ni Presidente Gloria Macapagal-Arroyo
na nagdemiter sa puesto asin nagsuporta sa campania na “Gloria
Resign”.
Nagpaliwanag an diputado kan cuarto distrito na an National
Historical Commission dai man nagtutugot na gamiton an pangaran
nin tao sa sarong highway o tinampo na dai man naging oficial kan
gobierno. Kaya ngani nagtugot na ribayan na sana kan Gov. Felix
Alfelor, Sr. Highway.
Naghihinanakit an mga sadiring tao ni Boncodin sa Ciudad nin Iriga
huli ta kan yaon pa sa puesto an pig-invitaran na maging juespe de
honor sa pag-orgullo na ipangaran sa saiyang ama an sinambit na
proyecto.
Alagad huli ta naging contra na ki Presidente Arroyo, pighaloan pa
giraray nin politica nakadamay pa an dipuntong ama kan dating DBM
Secretary.
