---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


Aldao nin mga Puso

An aldao nin mga puso pigce-celebrar sa ika-katorce can pebrero;
Tanganing giromdomon an pagkamino-rootan can mga tawo.
Pero mas madahom cun an pagkamoot oro-aldao tang ipamati
Sa satuyang mga padaba habang sinda makusog pa, asin dae pa nahali.

An sarong burak mas mahamot cun an tatawan kaini nakakaparong pa,
Kesa tambak na corona nin mga burak kun dae na ma-apreciar ta gadan na.
Mas magigiromdoman an halipot na panahon cun maogma an pag-iriba-iba,
Kesa halawig asin sobrang pagtangis sa puntod can tawong namomotan ta!

Dakul na paagi an na-iisipan sa pagcelebrar can aldao nin mga puso:
Valentine card, mga pulang rosas, asin pagdurokotan nin mga nguso.
Dinner date, mga tsokolate, kotse, magin mga alahas na diamante,
Pero sa cadaklan, magka-iribahan lang, pwede ng maapod na bastante!

An aldao nin mga puso magigin macolor asin matingkad na gayo,
Kun an pag-iribahan honesto, matoninong, asin may pagmato.
Mas makusog pa sa epoxy an kapot, mas malapot pa sa tangguli,
An pagkamoot na pig-aataman, pigbubub-ho sa aldao asin banggi!