---

LGU Albay, nakaka-insulto - Bordado

An Sanggunian Panlungsod kan Ciudad nin Naga nagpasar nin contra resolucion kan Sanggunian Panlalawigan kan Albay na naghahagad ki Agriculture Secretary Domingo Panganiban na ibalyo an mga oficina regional kan Department of Agriculture (DA) asin Bureau of Fisheries and Aquatic Resources (BFAR) hali sa Pili, Camarines Sur pasiring sa pigsasabi nindang regional center kan Bicol sa Ciudad nin Legaspi.

“Grabe an kusog boot kan Sanggunian Panlalawigan kan Albay, padarahan kami nin resolucion, nakakainsulto naghahagad nin suporta na halion sa Camarines Sur an duwang oficina regional.” Ini an mga comentario ni bise alcalde Gabriel H. Bordado, Jr. matapos magpasar sinda nin resolucion na nagreregistro nin pag-contra na ibalyo an oficina regional kan DA asin BFAR sa Ciudad nin Legaspi.

Si Consejal Salvador Del Castillo iyo an nagpadreno sagcod na naging joint and collective an motion sa session regular kan Pebrero 13, 2006 nganing sainda man na ibuelta ki Bise Gobernador Jesus B. Calisin na iyo an nagpadreno kan sinambit na resolucion sa sanggunian kan Albay.

Sobra na an ginigibo kan Albay huli ta kadakli ngani kan mga oficina regional yaon na sa Ciudad nin Legaspi iyo na sana an mga oficina kan DA asin BFAR na regional office na namumugtak sa Camarines Sur gusto pa nindang butongon.

Sinabi ni Del Castillo na an Camarines Sur mas mahiwas an land area sa agricultura establisado na nagseservi ngani sa anom na provincias kan kabikolan.

An mga oficiales kan DA Bicol an pusog man minacontra sa pangeturogan kan Albay. Sinabi ni assistant regional director Jose Dayao igwa na nin extension office an DA regional office sa Ciudad nin Legaspi gusto pang ambicionan na madara sa Albay.

An alegacion an oficina kan BFAR an nakikinabang sanang mga cliente si gikan sa Camarines Sur asin Camarines Norte. Kun maibalyo sa Ciudad nin Legaspi ini puedeng makaservi pa sa mga cliente sa mga provincias kan Albay, Catanduanes, Sorsogon asin Masbate.

An padatulan na rason ni Calisim na an pagbalyo kan mga oficina regional kan DA asin BFAR sa Legaspi City huli kan Presidential Proclamation No. 1676, ni dipuntong dictador Ferdinand Marcos na an sinambit na ciudad iyo an declaradong regional center kan Bicol.