Problema sa droga talamak
IRIGA CITY -- Si Senior Police Supt Tomasito Clet kan Iriga PNP
nagpahayag sa sarong intrevista kan local na prensa na dai man
dapat ngalasan an report na an Iriga iyo an ikaduwa sa listahan
kan mga banuaan asin ciudades sa Camarines Sur na may
pinakadakulang numero nin mga “paratsungki” o drug dependents.
Ini an naging reaccion ni Clet sa naenot ng pahayag sa sarong
intrevista ni Sr Supt Romeo Mapalo kan Police Provincial Office (PPO)
na an ciudad na ginikanan kan “superstar” na si Nora Aunor asin
kan familia Alfelor talamak na an nag-gagamit nin ilegal na droga.
Minsan ngani dai nagcontra sa testimonia ni Mapalo, an jepe kan
“Best City Police Station” sa Bicol kan 2005 asin 2006, sinabi ni
Clet na bagong ningas cogon an saiyang campania contra sa ilegal
na droga poon kan siya mag-abot sa Iriga asin ribayan sa puesto si
Supt. Ramon Ranara.
Tinawan doon pa kaini na documentado man an gabos nindang
acomplisimiento katakod kan saindang “all-out campaign” contra sa
criminalidad , particularmente sa mga suers aisn pushers nin
illegal drugs na mawot man ni Mayor Madelaine Alfelor Gazmen na
magkasaralakab.
Naghagad man nin dispensa si Clet sa publico kun sa pagheling
ninda kulang pa an saindang acomplisimiento, kasabay an pahayag na
an siring na bagay dai nanggad na miibitaran ta an kapulisan,
segun saiya kun minsan garo man sana cellphone na naglo-lowbatt
man.
Sa haros sarong taon anom na bulan sa saiyang puesto, si Clet
nagserbing recruiter na nakapalarga na nin sobra sa 30ng mga
durugista pasiring sa Iriga City District Jail sa Barangay La
Purisima laen pa kan mga “most wanted ciriminal.”
Si Clet, nangapudan man sa mga kamagurangan na i-report tolos sa
saiyang oficina kun may kaibahan sinda sa harong na nag-uusar nin
illegal na droga nganing an saindang futuro maisalbar pa. (Romeo
Olea)
