SP Cam. Sur surog na sa LGU Naga
PILI, Camarines Sur - Nagsurog na an Sanggunian Panlalawigan kan
Camarines Sur sa Sanggunian Panlungsod kan Ciudad nin Naga kan
magpasar man nin resolucion sa session regular kan Martes (Febrero
14) na nag-ooponer sa kahurotan kan gobierno provincial kan Albay
na ibalyo an mga oficina regional kan DA asin BFAR sa Rawis,
Ciudad nin Legaspi.
Si Vocal Waren Señar kan premirong distrito kan Camarines Sur iyo
an nagpadreno kan resolucion sagcod na pigfavoran kan gabos na
miembros kan consejo provincial.
Nag-contra an junta provincial huli ta haloy nang mantinedo an
sinambit na mga oficina asin dapat magka-igwa man nin pagheras nin
poder bako lang koanon na gabos kan Ciudad nin Legaspi an mga
oficina regional mientras na dakul pang mga empleados an ma-aafectaran
na digdi na naka-establiser kan saindang residencia.
Sa lado ni Vocal Angel Naval kan segundo distrito kan Camarines
Sur kun an DA igwang P300 asta P400 milliones na fondo para sa
pagbalyo kan sinambit na mga oficina regional gamiton nalang sa
mga livelihood asin iba pang mga programa na papakinabangan kan
mga paraoma.
Dakula an sinambit na cantidad igwa pang produccion envez na
maglustay sana nin dakulang fondo an gobierno nacional ngani
sanang favoran an sarong ciudad o provincia na nag-aambicion
ibalyo sa saindang lugar an mga agencias de gobierno.
Dai siya contra kan pigsasabi kan LGU Albay na regional center kan
Bicol an Ciudad nin Legaspi, alagad dapat maintindihan an
kamugtakan orog na an milliones pesos na gagastoson sa pagbalyo
huli ta kaipuhan pa na magpa-construir naman nin bagong edificio.
Kaipuhan maging practical ngonian na panahon nin crisis bakong
naka-isip na magpa-construir nin edificio apesar na igwa man
sanang presenteng ginagamit, sabi pa ni Naval.
An mga oficiales asin empleado kan DA asin BFAR an dai man
nagsusuporta kan ambicion kan LGU Albay huli ta dapat ma-intindihan
an kamugtakan kan pagbuhay ngonian na panahon.
Marhay sana si nagpapadreno kan resolucion na makoa ninda an mga
oficina, alagad si afectadong empleados asin fondo kan gobierno
iyo an dai naheheling, sabi man kan mga empleados kan DA asin BFAR.
