---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


STL

Small Town Lottery o STL an bagong sugal na gustong ipa-oso,
Tanganing mapuho daa an jueteng asin iba pang illegal na juego.
Ini soboot suportado can mga namamayo nin local na gobierno,
Ta igua man sindang hiras sa madedelihinsyang taya can mga tawo!

Maski pa ilegalizar can gobierno an sugal, may kararatan man giraray,
Nin huli ta tinotokdoan an tawong maghinogak imbis maghanap-buhay.
Imbis sa higos nin trabajo magpaganot, o magbanat nin buto para umasenso,
Naasa na lang sa ma-abot na swerte, o sawisaw sa tinatayaang numero!

Dahil sa STL pira an matatawan nin pangmahaloyan asin maninigong trabajo?
Dahil sa STL pira an magigin dagdag na ingrso can mga local na gobierno?
Dahil sa STL, pirang nagtiti-os an magkaka-igwa nin toltol na hanap-buhay?
Dahil sa STL, pirang pamilya an matatabangan para an buhay dumayaday?

Dahil sa STL, gurano man an mapapaduman sa bulsa can lambang alkalde?
Dahil sa STL, gurano man an marerecebi can mga kapulisan asin ni hepe?
Dahil sa STL, gurano man an madedelihinsya can iba pang mga politico?
Dahil sa STL, gurano man an hiras na makaka-abot duman sa Palacio?

An STL saro sanang pamama-agi o STyLe can gobiernong Arroyo
Para makalikom dakul na perak, mahirasan mga kakamping politico!
An pondong mahali digdi, gagamiton man sa maabot na eleccion,
O mga espuerzos na mapadanay sa poder can presenteng administracion!